नवी दिल्ली : अफगाणिस्तानचे उद्योग आणि वाणिज्य मंत्री अलहाज नूरुद्दीन अजीजी सहा दिवसांच्या भारत दौऱ्यावर आहेत. त्यांनी सोमवारी एका कार्यक्रमात बोलताना भारताला गुंतवणुकीसाठी आकर्षक ऑफर दिली. अफगाणिस्तान सरकार सोन्याच्या खाणीसाठी गुंतवणूक करणाऱ्यांना पुढील पाच वर्षे कर सवलत देणार असल्याचे ते म्हणाले. असोचेमच्या कार्यक्रमात ते बोलत होते. भारतीय कंपन्यांनी गुंतवणुकीसाठी यंत्रसामग्री आयात केल्यास त्यांना केवळ एक टक्के शुल्क भरावे लागेल, असे ते म्हणाले.
अफगाणिस्तानमध्ये प्रचंड क्षमता आहे. तुम्हाला तिथे फारसे स्पर्धकही मिळणार नाहीत.गुंतवणूक करणाऱ्या कंपन्यांना करासंबंधी फायदा दिला जाईल आणि जमीनही उपलब्ध करून दिली जाईल; असे अफगाणिस्तानचे उद्योग आणि वाणिज्य मंत्री अलहाज नूरुद्दीन अजीजी म्हणाले. नवीन क्षेत्रांमध्ये गुंतवणूक करणाऱ्या कंपन्यांना पाच वर्षांसाठी कर सवलत मिळेल, असेही त्यांनी सांगितले.
सोने उत्खननासाठी तांत्रिक आणि व्यावसायिक टीम किंवा व्यावसायिक कंपन्यांची आवश्यकता असेल. पण शक्य त्या क्षेत्रांसाठी जास्तीत जास्त रोजगार निर्मिती अफगाणिस्तानमधूनच व्हावी एवढीच अट असल्याचे ते म्हणाले.
आम्ही भारत आणि अफगाणिस्तान मधील संबंध सुधारू इच्छितो. व्हिसा, एअर कॉरिडोर आणि बँकिंग व्यवहार यांसारख्या काही लहान अडचणी आहेत ज्या द्विपक्षीय व्यापार आणि गुंतवणूक सुधारण्यासाठी आवश्यक आहेत; असेही अफगाणिस्तानचे उद्योग आणि वाणिज्य मंत्री अलहाज नूरुद्दीन अजीजी म्हणाले.
