कोल्हापूर : कोल्हापूरच्या मध्यवर्ती बसस्थानक परिसरात महिलांच्या गळ्यातील सोन्याचे दागिने चोरी करणाऱ्या एका महिलेचा पर्दाफाश करण्यात पोलिसांना यश आले आहे. विशेष म्हणजे, घरची आर्थिक परिस्थिती चांगली असूनही ही महिला विविध शहरांतील बसस्थानकांवर जाऊन सोन्याच्या दागिन्यांवर डल्ला मारत असल्याचे तपासात समोर आले आहे. स्थानिक गुन्हे अन्वेषण शाखेने तिला पुणे शहरातून अटक केली आहे.

पोलिसांनी दिलेल्या माहितीनुसार, आरोपी महिलाने आपल्या गावी जात असल्याचे सांगून घराबाहेर पडत होती. त्यानंतर ती अक्कलकोट, इस्लामपूर, सांगली, सोलापूर आणि कोल्हापूरसह विविध शहरांतील गर्दीच्या बसस्थानकांवर जात असे. गर्दीचा फायदा घेत ती महिलांच्या गळ्यातील सोन्याचे दागिने चोरण्याचे प्रकार करत असल्याचे उघड झाले आहे.

https://prahaar.in/2026/06/01/accident-on-mumbai-pune-express-way-2-died-missing-link-traffic-stop-for-hour/

मागील आठवड्यात २४ मे रोजी कोल्हापूरच्या मध्यवर्ती बसस्थानकात मोठी गर्दी होती.याच गर्दीचा फायदा घेत एसटी बसमध्ये चढताना दोन महिलांच्या गळ्यातील सोन्याची मंगळसूत्रे चोरीला गेली. या घटनेनंतर परिसरात खळबळ उडाली होती. या प्रकरणी तात्काळ स्थानिक पोलीस ठाण्यात तक्रार देण्यात आली. या प्रकरणाचे गांभीर्य लक्षात घेऊन तपास स्थानिक गुन्हे अन्वेषण शाखेकडे सोपवण्यात आला.

पोलिसांनी बसस्थानक परिसरातील सीसीटीव्ही फुटेजची तपासणी केली. तसेच तांत्रिक माहितीच्या आधारे संशयित महिलेचा माग काढण्यात आला. तपासादरम्यान पोलिसांनी पुण्यातून आरोपी महिलेला ताब्यात घेतले. चौकशीमध्ये तिने चोरीची कबुली दिल्याची माहिती पोलिसांनी दिली.

या कारवाईत पोलिसांनी तिच्याकडून २ लाख ८९ हजार ८०० रुपये किमतीची दोन सोन्याची मंगळसूत्रे जप्त केली आहेत. जुना राजवाडा पोलीस ठाण्याच्या हद्दीत घडलेल्या या गुन्ह्याचा छडा लागल्याने पोलिसांनी समाधान व्यक्त केले आहे. आरोपी महिलेचे इतर चोरीच्या घटनांशी संबंध आहेत का, तसेच ती कोणत्याही टोळीशी जोडलेली आहे का, याचा तपास सुरू आहे.