पुणे : जिल्ह्यातील भोर तालुक्यात एक अत्यंत धक्कादायक आणि संतापजनक घटना उघडकीस आली आहे. एका गावात चार वर्षांच्या चिमुकलीवर लैंगिक अत्याचार करून तिची निर्घृण हत्या करण्यात आल्याची माहिती समोर आली आहे. या घटनेमुळे संपूर्ण परिसर हादरला असून नागरिकांमध्ये तीव्र संतापाची भावना व्यक्त होत आहे. पोलिसांनी या प्रकरणातील आरोपीला ताब्यात घेतले आहे.

नेमकं प्रकरण काय ?

प्राथमिक माहितीनुसार, सुमारे ६५ वर्षीय आरोपीने घरासमोर खेळत असलेल्या एका ४ वर्षांच्या चिमुकलीला गोठ्यात नेले. तेथे तिच्यावर अत्याचार करून त्यानंतर तिची दगडाने ठेचून हत्या केली. आपला गुन्हा लपवण्यासाठी आरोपीने मुलीचा मृतदेह शेणाच्या ढिगाऱ्याखाली लपवून ठेवला होता. दुपारपासून मुलगी दिसत नसल्याने कुटुंबीयांनी शोध घेतला असता ती गोठ्यात मृत अवस्थेत आढळून आली. परिसरातील सीसीटीव्ही फुटेज तपासल्यानंतर आरोपी मुलीला त्या दिशेने नेत असल्याचे दिसून आले आणि हा सगळा प्रकार उघड झाला. संबंधित चिमुकली सुट्टीसाठी आजीकडे आली होती, अशी माहिती स्थानिकांनी यावेळी दिली.

https://prahaar.in/2026/05/01/changes-in-megablock-schedule-for-neet-ug-exam-find-out-where-and-when-the-megablock-will-take-place/

पोक्सो (POCSO) कायद्यासह खुनाचा गंभीर गुन्हा दाखल :

घटनेची माहिती मिळताच पोलीस घटनास्थळी दाखल झाले आणि पंचनामा करून मृतदेह शवविच्छेदनासाठी पाठवण्यात आला. या प्रकरणी आरोपीविरोधात पोक्सो (POCSO) कायद्यासह खुनाचा गंभीर गुन्हा दाखल करण्यात आला असून पुढील तपास वेगाने सुरू आहे. पोलिसांकडून आरोपीची कसून चौकशी करण्यात येत आहे, तसेच घटनेमागील सर्व पैलूंचा तपास केला जात आहे.

संपूर्ण गावात संतापाची लाट :

या घटनेनंतर गावात संतापाची लाट उसळली. संतप्त ग्रामस्थांनी मुलीचा मृतदेह पोलीस ठाण्याबाहेर ठेवत निषेध व्यक्त केला आणि रास्ता रोको आंदोलन सुरू केले. “आरोपीला कठोरात कठोर शिक्षा व्हावी” अशी मागणी नागरिकांकडून जोर धरत आहे. काही काळ परिसरात तणावाचे वातावरण निर्माण झाले होते, मात्र पोलिसांनी परिस्थिती नियंत्रणात आणण्यासाठी अतिरिक्त बंदोबस्त तैनात केला आहे.

https://prahaar.in/2026/05/01/we-arent-backing-down-for-the-next-25-years-khankar-sternly-warned-the-opposition/

दरम्यान, स्थानिक प्रशासनाने नागरिकांना शांतता राखण्याचे आवाहन केले असून, दोषीवर कठोर कारवाई करण्याचे आश्वासन दिले आहे. या घटनेमुळे राज्यातील महिला आणि बालकांच्या सुरक्षेचा प्रश्न पुन्हा ऐरणीवर आला असून, अशा प्रकारच्या गुन्ह्यांना आळा घालण्यासाठी कडक उपाययोजना करण्याची मागणी सर्व स्तरांतून होत आहे.