हरिद्वार : उत्तराखंडमधील हरिद्वार शहरात शनिवारी एक अत्यंत खळबळजनक आणि संतापजनक घटना घडली आहे. आपल्याच वरिष्ठांच्या सुरक्षेची जबाबदारी असलेल्या एका चालकाने थेट गुप्तचर विभागाच्या (Intelligence Bureau – IB) अधिकाऱ्यावर गोळी झाडल्याची धक्कादायक बाब समोर आली आहे. जखमी झालेल्या अधिकाऱ्याचे नाव सी. पी. नौटियाल असून ते गुप्तचर विभागात पोलीस अधीक्षक (SP) या महत्त्वाच्या पदावर कार्यरत आहेत. या घटनेमुळे संपूर्ण परिसरात आणि प्रशासनात मोठी खळबळ उडाली आहे.
या घटनेनंतर पोलिसांनी तात्काळ सूत्रे हलवत आरोपी चालक विनोद नेगी याला ताब्यात घेतले आहे. दुसरीकडे, गोळीबारात गंभीर जखमी झालेल्या सी. पी. नौटियाल यांना सुरुवातीला जवळच्या एका स्थानिक रुग्णालयात नेण्यात आले. तेथे त्यांच्यावर तातडीचे प्राथमिक उपचार करण्यात आले. मात्र, त्यांच्या जखमांचे गांभीर्य लक्षात घेता डॉक्टरांच्या सल्ल्यानुसार त्यांना अधिक चांगल्या आणि विशेष उपचारांसाठी ऋषिकेश येथील ‘एम्स’ (AIIMS) रुग्णालयात दाखल करण्यात आले आहे.
https://www.prahaar.in/2026/11/21/watch-nita-ambani-prepares-for-bharatanatyam-performance-at-nmacc-mumbaicalls-it-tribute-to-her-father/
मिळालेल्या माहितीनुसार, गोळीबाराची ही घटना हरिद्वारमधील कनखल पोलीस ठाण्याच्या हद्दीत घडली. गोळी नौटियाल यांना चाटून गेली असली, तरी या हल्ल्यात त्यांना गंभीर दुखापत झाली आहे. गुप्तचर विभागासारख्या संवेदनशील संस्थेतील वरिष्ठ अधिकाऱ्यावर अशा प्रकारे गोळीबार झाल्याने स्थानिक पोलीस आणि इतर सुरक्षा यंत्रणांमध्ये चिंतेचे वातावरण पसरले आहे. या हल्ल्यामागचे नेमके कारण पोलिसांनी अद्याप अधिकृतपणे जाहीर केलेले नसले, तरी कामाच्या अतिताणामुळे चालक तणावाखाली किंवा नाराज होता आणि याच रागातून त्याने हा प्रकार केला असावा, असे ‘दैनिक भास्कर’च्या एका अहवालात म्हटले आहे.
या संपूर्ण प्रकरणावर भाष्य करताना वरिष्ठ पोलीस अधीक्षक (SSP) नवनीत सिंह भुल्लर यांनी सविस्तर माहिती दिली. ते म्हणाले की, “एका अधिकाऱ्यावर त्यांच्याच चालकाने गोळीबार केल्याची घटना घडली असून आम्ही या घटनेतील सर्व बाबींची खातरजमा करत आहोत. जखमी अधिकाऱ्यावर प्राथमिक उपचार झाले आहेत. आरोपी हा तात्पुरत्या स्वरूपात चालक म्हणून काम पाहत होता; त्याला पोलिसांनी अटक केली असून तो सध्या पोलीस कोठडीत आहे. त्याने हा गोळीबार नेमक्या कोणत्या कारणासाठी केला, याचा शोध घेण्यासाठी त्याची सखोल चौकशी सुरू आहे. या प्रकरणात कायद्यानुसार पुढील कठोर कारवाई केली जाईल. तपास पूर्ण होऊन सर्व तथ्य समोर आल्यानंतर आम्ही याबाबत अधिक माहिती देऊ.”