जपानमधील नागोया येथे सुरू असलेल्या आशियाई पॅरा गेम्स 2026 मध्ये भारताच्या दिव्यांग खेळाडूंनी धमाकेदार कामगिरी करत देशाची मान उंचावली आहे. भारताच्या स्टार पॅरा ॲथलीट सुवर्णा राजने महिलांच्या थाळीफेक प्रकारात सुवर्णपदक जिंकत भारतासाठी सुवर्णखाते उघडले. तिच्या या ऐतिहासिक कामगिरीसह पॅरा बॅडमिंटन आणि तिरंदाजीतही भारतीय खेळाडूंनी पदकांची कमाई केली आहे.

सुवर्णा राजची सुवर्णझेप, 15.66 मीटर फेकत रचला इतिहास

महिलांच्या थाळीफेक एफ-५४ प्रकारात उत्तर प्रदेशच्या ग्रेटर नोएडा येथील सुवर्णा राजने आपल्या चमकदार खेळाचे प्रदर्शन केले. सहा खेळाडूंमध्ये झालेल्या या अटीतटीच्या स्पर्धेत सुवर्णाने तिच्या सहापैकी चार प्रयत्नांत 15 मीटरहून अधिक लांब थ्रो केला. तिने पाचव्या प्रयत्नात सर्वोत्तम कामगिरी करत 15.66 मीटर अंतर पार केले आणि अव्वल स्थान पटकावले. या प्रकारात इराणच्या शाहला हदीदीने रौप्य तर व्हिएतनामच्या न्गुयेन थी न्गोक थुईने कांस्य पदक जिंकले.

https://www.prahaar.in/2026/10/22/ind-vs-nz-1st-t20-the-toss-goes-in-indias-favor-captain-iyer-chooses-to-bowl-first-and-says/

पॅरा बॅडमिंटनमध्ये भारताला दोन कांस्यपदके

पॅरा बॅडमिंटनच्या मिश्र दुहेरी प्रकारात भारताला दोन कांस्यपदके मिळाली. SL-3-SU-5 प्रकारात मनीषा रामदास आणि प्रमोद भगत यांच्या जोडीने उत्कृष्ट खेळ केला, मात्र उपांत्य फेरीत इंडोनेशियाच्या जोडीकडून त्यांना 21-16, 13-21, 17-21 असा पराभव पत्करावा लागला. तसेच, SH-6 प्रकारात कृष्णा नागर आणि नित्या श्री यांच्या जोडीलाही इंडोनेशियाच्या खेळाडूंविरुद्ध 14-21, 18-21 ने पराभव स्वीकारावा लागला, ज्यामुळे दोन्ही जोड्यांना कांस्यपदकावर समाधान मानावे लागले.

स्वाती चौधरीने तिरंदाजीत जिंकले रौप्यपदक

तिरंदाजीच्या महिलांच्या W-1 वैयक्तिक स्पर्धेत भारताच्या स्वाती चौधरीने चमकदार कामगिरी करत रौप्यपदक आपल्या नावावर केले. अंतिम फेरीत चीनच्या मेंगकान सेनविरुद्ध स्वातीने सुरुवातीला 4-2 अशी आघाडी घेतली होती, परंतु चुरशीच्या सामन्यात चिनी तिरंदाजाने पुनरागमन करत स्वातीचा 6-4 ने पराभव केला आणि स्वातीला रौप्यपदकावर संतोष मानवा लागला.