सकाळची घाई, कामाची वेळ, वजन कमी करण्याचा प्रयत्न किंवा सकाळी भूक न लागणे यामुळे अनेकजण नाश्ता टाळतात. ‘दुपारच्या वेळेत व्यवस्थित जेवणारच आहोत, मग नाश्ता करण्याची गरज काय?’ असा प्रश्नही अनेकांच्या मनात असतो. मात्र, आरोग्याचा विचार करताना आपण काय खातो यासोबतच ते कधी खातो, हे देखील महत्त्वाचे मानले जाते.

नियमितपणे नाश्ता टाळू नका

नाश्ता नियमितपणे टाळण्याचा संबंध हृदय आणि रक्तवाहिन्यांच्या आरोग्याशी असल्याचे काही संशोधनातून समोर आले आहे. एका विश्लेषणातून अशी माहिती समोर आली आहे की, नियमित नाश्ता करणाऱ्यांच्या तुलनेत नाश्ता टाळणाऱ्यांमध्ये हृदयविकाराशी संबंधित आजारांचा धोका अधिक असल्याचे आढळले. मात्र, हे संशोधन प्रामुख्याने निरीक्षणावर आधारित असल्याने नाश्ता टाळणे हेच हृदयविकाराचे थेट कारण आहे, असे निश्चितपणे म्हणता येत नाही.

https://www.prahaar.in/2026/09/29/important-news-for-pf-account-holders-perform-these-pf-related-tasks-from-the-comfort-of-your-home-using-the-umang-app/

योग्य वेळी जेवण आणि झोप घेणे महत्त्वाचे

शरीरात एक नैसर्गिक जैविक घड्याळ असते. त्याला सर्केडियन रिदम (Circadian rhythm) म्हटले जाते. झोप, हार्मोन्स, रक्तदाब आणि शरीरातील चयापचय यांसारख्या अनेक प्रक्रिया या घड्याळाशी जोडलेल्या असतात. आपण अन्न कोणत्या वेळी खातो, याचाही शरीरावर परिणाम होऊ शकतो.

https://www.prahaar.in/2026/10/01/fed-up-with-cockroaches-and-red-ants-in-the-kitchen/

अनियमित झोप आणि जेवणाच्या वेळेतील अनियमितता यांचा लठ्ठपणा, टाइप-2 मधुमेह, उच्च रक्तदाब आणि हृदयाशी संबंधित आजारांशी संबंध आढळतो. विशेषतः रात्री उशिरा किंवा अनियमित वेळी जेवण्यामुळे शरीराच्या चयापचयावर परिणाम होऊ शकतो.

एकाच वेळी जास्त जेवण करू नका

नाश्ता टाळल्यामुळे काही लोकांमध्ये दिवसभरातील खाण्याची पद्धत बदलू शकते. सकाळपासून बराच वेळ काहीही न खाल्ल्याने दुपारी किंवा संध्याकाळी जास्त भूक लागू शकते. यामुळे एकाच वेळी जास्त प्रमाणात किंवा जास्त कॅलरी असलेले पदार्थ खाण्याची शक्यता वाढते.

मुख्यत: नाश्त्यामध्ये या पदार्थांचा समावेश करावा

मात्र, नाश्ता करणे म्हणजे कोणताही पदार्थ खाणे नव्हे. साखरेचे पदार्थ, मैद्याचे पदार्थ, पॅकेज्ड सीरिअल्स किंवा अतिप्रक्रिया केलेले अन्न नियमित खाल्ल्यास त्याचा आरोग्यावर चांगला परिणाम होईलच असे नाही. त्यामुळे नाश्त्यामध्ये प्रथिने, फायबर, संपूर्ण धान्य, फळे आणि पौष्टिक पदार्थांचा समावेश करणे अधिक योग्य ठरते.

कार्डिओलॉजी तज्ज्ञांच्या माहितीनुसार, दिवसभरातील आहारासोबत जेवणाच्या वेळेची नियमितताही महत्त्वाची आहे. त्यामुळे नाश्ता टाळण्याची सवय असेल तर आपल्या एकूण आहाराची पद्धत आणि जीवनशैलीकडे लक्ष देणे गरजेचे आहे.