एका महिलेला ३८ आठवड्यांची गरोदर असल्याचे सांगून रुग्णालयात दाखल करण्यात आले. कुटुंबीयांच्या हातात सोनोग्राफीचे रिपोर्ट होते, ज्यानुसार बाळ पूर्ण वाढलेले दिसत होते. डॉक्टरांनी सर्व वैद्यकीय चाचण्या पूर्ण करून महिलेला प्रसूतीसाठी शस्त्रक्रिया गृहात (OT) नेले. मात्र, सिझेरियन ऑपरेशनसाठी पोट उघडताच डॉक्टरांचे पाय खालील जमीन सरकली महिलेच्या गर्भाशयात बाळच नव्हते! बाळ गायब झाल्याचा आरोप करत नातेवाईकांनी रुग्णालयात एकच गोंधळ घातला. परंतु, पोलिसांच्या तपासात जेव्हा या संपूर्ण प्रकरणामागील धक्कादायक सत्य समोर आले, तेव्हा सर्वांचेच डोळे पाणावले.

https://www.prahaar.in/2026/09/03/17-year-old-college-girl-stabbed-to-death-in-the-middle-of-a-busy-intersection-in-amravati-murder-suspected-to-be-a-case-of-unrequited-love/

ही चक्रावणारी घटना पाकिस्तानमधील कराची शहरातून समोर आली आहे. २७ ऑगस्ट रोजी ही महिला कुटुंबीयांसह प्रसूतीसाठी रुग्णालयात पोहोचली होती. तिने डॉक्टरांना ३८ आठवडे गरोदर असल्याचे सोनोग्राफी रिपोर्ट दाखवले. डॉक्टरांनी त्या कागदपत्रांच्या आधारे प्राथमिक तपासणी करून सीझर करण्याचा निर्णय घेतला. मात्र, शस्त्रक्रियेदरम्यान पोटात बाळ आढळलेच नाही. यानंतर संतप्त कुटुंबीयांनी डॉक्टरांवर बाळ चोरल्याचा थेट आरोप करत गोंधळ घातल्याने तातडीने पोलिसांना बोलावावे लागले. पोलिसांनी प्रकरणाची सूत्रे हाती घेत सखोल चौकशी केली असता, हे बाळ चोरीचे नसून ‘बोगस प्रेग्नन्सी’चे प्रकरण असल्याचे स्पष्ट झाले.

पोलीस तपासात उघड झाले की, लग्नाला तीन वर्षे उलटूनही मूल होत नसल्याने सासरच्या मंडळींकडून या महिलेवर प्रचंड मानसिक दबाव होता. याच दबावाला बळी पडून तिने आपण गर्भवती असल्याचे खोटे नाटक रचले आणि ९ महिने सर्वांना अंधारात ठेवले. हे नाटक खरे वाटण्यासाठी तिने बनावट अल्ट्रासाऊंड रिपोर्ट्स तयार केले होते. या घटनेनंतर रुग्णालयाच्या निष्काळजीपणावरही प्रश्न उपस्थित केले जात आहेत, कारण कोणत्याही मोठ्या शस्त्रक्रियेपूर्वी स्वतःचे अल्ट्रासाऊंड न करता केवळ पेशंटने आणलेल्या रिपोर्टवर विश्वास ठेवून डॉक्टरांनी सीझरचा निर्णय कसा घेतला, याचा तपास आता आरोग्य प्रशासन करत आहे.