मुंबई : शिवसेना पक्षाच्या मालकीबाबत सर्वोच्च न्यायालयात सुनावणी सुरू असतानाच उपमुख्यमंत्री एकनाथ शिंदे (Eknath Shinde) यांनी विरोधकांवर जोरदार हल्लाबोल केला. “शिवसेना कोणाची, याचा निकाल महाराष्ट्राच्या जनतेने आधीच दिला आहे. आम्ही ४० आमदारांसह बाहेर पडलो आणि जनतेने आम्हाला ६० आमदारांपर्यंत पोहोचवून आपल्या निर्णयावर शिक्कामोर्तब केले,” असे ते म्हणाले.

शिंदे यांनी स्पष्ट केले की, जनतेच्या न्यायालयात शिवसेनेच्या नेतृत्वाचा निर्णय आधीच झाला असून आता न्यायालयीन प्रक्रियेवरही त्यांचा पूर्ण विश्वास आहे.

‘जनतेच्या न्यायालयात आधीच विजय मिळाला’ :

एकनाथ शिंदे (Eknath Shinde) म्हणाले, “लोकशाहीत अंतिम निर्णय जनतेचा असतो. महाराष्ट्रातील मतदारांनी आम्हाला भरघोस पाठिंबा देत शिवसेनेच्या नेतृत्वावर विश्वास व्यक्त केला आहे. त्यामुळे शिवसेना कोणाची, याचे उत्तर जनतेनेच मतदानातून दिले आहे.” त्यांनी सांगितले की, न्यायालयीन लढाई सुरू असली तरी लोकशाहीच्या कसोटीवर जनतेने दिलेला कौल महत्त्वाचा आहे.

https://prahaar.in/2026/08/06/gen-z-and-gen-alpha-are-more-honest-than-older-generations-sarsanghchalak-dr-mohan-bhagwat-in-a-democracy-protests-are-also-a-medium-of-dialogue/

‘घटनाबाह्य सरकार’च्या आरोपांवर प्रत्युत्तर :

विरोधकांकडून सातत्याने होत असलेल्या ‘घटनाबाह्य सरकार’ या आरोपांवरही शिंदे (Eknath Shinde) यांनी जोरदार प्रत्युत्तर दिले. त्यांनी सर्वोच्च न्यायालयाचे माजी सरन्यायाधीश डी. वाय. चंद्रचूड यांच्या निकालाचा उल्लेख करत सांगितले की, सरकार संविधान आणि कायद्यानुसार स्थापन झाले असल्याचे सर्वोच्च न्यायालयाने स्पष्ट केले आहे. “तरीही विरोधक तीच जुनी आणि फाटलेली कॅसेट पुन्हा पुन्हा वाजवत आहेत,” असा टोला त्यांनी लगावला.

‘निकाल बाजूने आला तर स्वागत, विरोधात गेला तर टीका’ :

विरोधकांच्या भूमिकेवर निशाणा साधताना शिंदे (Eknath Shinde) म्हणाले की, “निकाल त्यांच्या बाजूने लागला तर न्यायालयाचा गौरव करायचा आणि निकाल विरोधात गेला की न्यायालयालाच शिकवण्याचा प्रयत्न करायचा, ही त्यांची भूमिका आहे.” ते पुढे म्हणाले की, न्यायव्यवस्था, निवडणूक आयोग आणि इतर घटनात्मक संस्थांवर सातत्याने प्रश्नचिन्ह उपस्थित करणे ही विरोधकांची राजकीय संस्कृती बनली आहे.

https://prahaar.in/2026/08/06/if-i-had-missed-the-shoot-i-would-have-been-working-non-stop-for-24-hours-for-kbc-a-salute-to-amitabh-bachchans-determination-even-at-the-age-of-83/

‘न्यायदेवतेवर पूर्ण विश्वास’ :

एकनाथ शिंदे (Eknath Shinde) यांनी सांगितले की, त्यांचा कोणावरही वैयक्तिक टीका करण्याचा हेतू नसून ते जनतेच्या विश्वासावर आणि न्यायव्यवस्थेवर श्रद्धा ठेवतात. “सत्य, संविधान आणि जनमत या तिन्ही गोष्टी आमच्या बाजूने असल्याने आम्ही निर्धास्त आहोत. न्यायदेवतेवर आमचा पूर्ण विश्वास आहे,” असे त्यांनी ठामपणे सांगितले.

विरोधकांवर जोरदार निशाणा :

शिवसेना पक्षाच्या मालकीबाबत सर्वोच्च न्यायालयात कायदेशीर प्रक्रिया सुरू असली, तरी राजकीय आणि जनाधाराच्या कसोटीवर शिवसेनेला जनतेनेच मान्यता दिली आहे, असा दावा करत शिंदे (Eknath Shinde) यांनी विरोधकांवर जोरदार प्रहार केला. त्यांच्या या विधानामुळे राज्यातील शिवसेना विरुद्ध ठाकरे गटातील राजकीय संघर्ष पुन्हा एकदा चर्चेत आला आहे.