मुंबई : महाराष्ट्र गृहनिर्माण आणि क्षेत्र विकास प्राधिकरण (म्हाडा) मुंबई गृहनिर्माण आणि क्षेत्र विकास मंडळाच्या 2,640 निवासी सदनिकांसाठी 6 ऑगस्ट रोजी संगणकीकृत सोडत काढणार आहे. यंदाच्या बहुप्रतिक्षित गृहनिर्माण सोडतीला नागरिकांकडून मोठा प्रतिसाद मिळाला असून प्रत्येक घरामागे सरासरी 28.54, म्हणजेच जवळपास 29 अर्जदारांनी अर्ज केला आहे.
म्हाडाकडे 2,640 घरांसाठी एकूण 75,366 अर्ज प्राप्त झाले आहेत. महाराष्ट्र विधान परिषद निवडणुकीमुळे लागू झालेल्या आदर्श आचारसंहितेमुळे ही सोडत जूनऐवजी ऑगस्टमध्ये घेण्यात येत आहे.
या सोडतीत मुंबई गृहनिर्माण आणि क्षेत्र विकास मंडळ तसेच मुंबई इमारत दुरुस्ती आणि पुनर्रचना मंडळामार्फत उपलब्ध करण्यात आलेल्या घरांचा समावेश आहे. यात नव्याने बांधलेली घरे, विकास नियंत्रण नियम (DCR) 33(5) आणि 33(7) अंतर्गत विकासकांकडून प्राप्त सदनिका तसेच पूर्वीच्या योजनांमधील न विकलेली घरे समाविष्ट आहेत.
https://prahaar.in/2026/08/05/fir-filed-against-those-dumping-unauthorized-debris-in-malad-dharavali-municipal-corporation-takes-a-tough-stand-no-leniency-henceforth/
30 मार्च 2026 रोजी या योजनेची जाहिरात प्रसिद्ध करण्यात आली होती, तर अर्ज करण्याची अंतिम मुदत 28 मे 2026 होती. बाजारभावाच्या तुलनेत कमी किंमत, आधुनिक सुविधा, पार्किंग, दर्जेदार बांधकाम आणि मोक्याची ठिकाणे यामुळे या योजनेला मोठा प्रतिसाद मिळाल्याचे म्हाडाने सांगितले.
मुंबईतील ‘या’ भागांत उपलब्ध घरे
या सोडतीतील घरे विक्रोळी (कन्नमवार नगर), गोरेगाव (पत्रा चाळ-सिद्धार्थ नगर, तुंगा, पगारीगाव, नागरगाव), बोरिवली (जुने मागाठाणे, गोराई), चेंबूर (सुभाष नगर), वांद्रे (गांधीनगर), घाटकोपर (पंतनगर), गिरगाव, वडाळा, कोपरी, अँटॉप हिल आदी भागांत उपलब्ध आहेत.
सर्व उत्पन्न गटांसाठी संधी
या योजनेत आर्थिकदृष्ट्या दुर्बल घटकांसाठी (EWS) 145, निम्न उत्पन्न गटासाठी (LIG) 858, मध्यम उत्पन्न गटासाठी (MIG) 798 आणि उच्च उत्पन्न गटासाठी (HIG) 839 सदनिकांचा समावेश आहे.
यंदाच्या सोडतीचे विशेष आकर्षण म्हणजे विक्रोळी (पूर्व) येथील कन्नमवार नगरमधील योजना क्रमांक 538 आणि 539 अंतर्गत बांधकामाधीन 1,221 फ्लॅट्सच्या किमतीत 7.5 टक्के कपात करण्यात आली आहे. याशिवाय योजना 538-A आणि 539-A अंतर्गत 610 सदनिका HIG गटासाठी राखीव ठेवण्यात आल्या असून या सदनिका बाजारभावापेक्षा कमी दरात उपलब्ध आहेत.
म्हाडाने स्पष्ट केले आहे की, 6 ऑगस्ट रोजी संगणकीकृत सोडतीद्वारे यशस्वी अर्जदारांची निवड करण्यात येईल. त्यानंतर वाटप प्रक्रिया आणि पुढील कार्यवाहीबाबतची सविस्तर माहिती जाहीर केली जाणार आहे.