लॉझेन : भारताचा स्टार भालाफेकपटू, माजी ऑलिम्पिक आणि जागतिक चॅम्पियन नीरज चोप्रा २१ ऑगस्ट रोजी होणाऱ्या लॉझेन डायमंड लीग (‘ॲथलेटिसिमा’) स्पर्धेत सहभागी होणार असल्याचे आयोजकांनी निश्चित केले आहे. लॉझेनमधील नीरजचा हा चौथा सहभाग असेल. नुकत्याच पार पडलेल्या राष्ट्रकुल क्रीडा स्पर्धेत ८५.८३ मीटर भालाफेक करत रौप्यपदक जिंकणारा नीरज आता आपल्या सर्वोत्तम फॉर्ममध्ये परतण्यासाठी उत्सुक आहे.

https://prahaar.in/2026/08/04/oneplus-16-launching-soon-8gb-ram-model-set-to-make-a-comeback-price-and-features-leaked/

२८ वर्षीय नीरजने २०२२ मध्ये ८९.०८ मीटर थ्रोसह या स्पर्धेत विजय मिळवला होता आणि २०२३ मध्ये ८७.६६ मीटर थ्रोसह विजेतेपद कायम राखले होते. तर २०२४ च्या आवृत्तीत ८९.४९ मीटरच्या शानदार फेकीनंतरही त्याला उपविजेतेपदावर समाधान मानावे लागले होते. दुखापतीमुळे दीर्घकाळ विश्रांती घेतल्यानंतर पुनरागमन करणाऱ्या नीरजची या वर्षातील ही तिसरी स्पर्धा असेल. जूनमधील दोहा डायमंड लीगमध्ये चौथ्या स्थानावर राहिल्यानंतर आणि राष्ट्रकुल स्पर्धेत रौप्यपदक पटकावल्यानंतर, जुलै २०२५ मधील ‘नीरज चोप्रा क्लासिक’नंतर असलेली विजेतेपदाची प्रतीक्षा संपवण्यासाठी लॉझेन हे त्याच्यासाठी आवडते आणि महत्त्वाचे मैदान ठरेल.

https://prahaar.in/2026/08/04/tejas-shirse-out-of-asian-games-due-to-stress-fracture/

स्पर्धेत दिग्गज खेळाडूंचे आव्हान

• रुमेश पथिरागे (श्रीलंका): नव्याने राष्ट्रकुल चॅम्पियन बनलेला आणि यंदाच्या हंगामातील अव्वल खेळाडू (८९.७५ मी. थ्रो) रुमेश पथिरागे याचे मुख्य आव्हान असेल.
• अर्शद नदीम (पाकिस्तान): ऑलिम्पिक चॅम्पियन अर्शद नदीमच्या सहभागामुळे या स्पर्धेत पुन्हा एकदा भारत विरुद्ध पाकिस्तान असा थरार पाहायला मिळेल.
• इतर दिग्गज: दोन वेळचा जागतिक चॅम्पियन अँडरसन पीटर्स (ग्रेनेडा), जर्मनीचा थॉमस रोहलर आणि त्रिनिदाद अँड टोबॅगोचा केशॉर्न वॉलकॉट हे खेळाडूदेखील मैदानात उतरतील.