कार्यपद्धतीवर आक्षेप; २५ हून अधिक कर्मचाऱ्यांचे अन्न व औषध प्रशासन मंत्र्यांना पत्र

मुंबई : अन्न व औषध प्रशासन विभागाचे (FDA) आयुक्त तुकाराम मुंढे (Tukaram Mundhe) यांच्या राज्यभरातील कारवाया आणि धडाकेबाज निर्णयांचा धसका प्रशासकीय वर्तुळात बसलेला असतानाच, आता त्यांच्याच विभागातील अधिकारी आणि कर्मचाऱ्यांनी त्यांच्या कार्यपद्धतीविरोधात बंड पुकारले आहे. छत्रपती संभाजीनगर येथील एफडीए प्रयोगशाळेतील तब्बल २९ अधिकारी व कर्मचाऱ्यांनी आयुक्त तुकाराम मुंढे यांच्या मनमानी कारभाराविरोधात अन्न व औषध प्रशासन मंत्री नरहरी झिरवळ यांच्याकडे लेखी तक्रार दाखल केली आहे.

https://prahaar.in/2026/07/30/uddhav-thackeray-uddhav-thackeray-appear/

संभाजीनगर येथील प्रयोगशाळेत अचानक दोन शिफ्टमध्ये काम सुरू करण्याचा निर्णय घेतल्याने कर्मचाऱ्यांना सकाळी ९ ते रात्री उशिरापर्यंत काम करावे लागत असून शनिवार आणि इतर सार्वजनिक सुट्ट्यांच्या दिवशीही कामावर हजर राहण्याचे कडक देण्यात आल्याचा आरोप या निवेदनात करण्यात आला आहे. आवश्यक मनुष्यबळ आणि सुविधा न देता अचानक दोन शिफ्ट लागू केल्यामुळे कर्मचाऱ्यांवर प्रचंड ताण येत असून विश्लेषणाच्या गुणवत्तेवरही विपरीत परिणाम होत असल्याचे अधिकाऱ्यांचे म्हणणे आहे.

अन्न, औषधे आणि सौंदर्यप्रसाधनांचे प्रलंबित नमुने जलद गतीने निकाली काढण्याच्या नादात घाईगडबड केली जात असून एका विश्लेषकाकडून त्याच्या क्षमतेपेक्षा अधिक नमुने तपासण्याचा दबाव टाकला जात आहे. त्यामुळे विश्लेषणातील अचूकता धोक्यात येण्याची भीती कर्मचाऱ्यांनी व्यक्त केली आहे. कार्यालयीन वेळ पूर्ववत लागू करावी, दोन शिफ्टची पद्धत रद्द करावी, शासकीय सुट्ट्यांचा लाभ पूर्ववत मिळावा आणि रिक्त पदे भरून पुरेसे मनुष्यबळ उपलब्ध करून द्यावे, अशा प्रमुख मागण्या या निवेदनाद्वारे करण्यात आल्या आहेत.