पिंपरी : पिंपरी-चिंचवड शहरातील सार्वजनिक वाहतूक व्यवस्था अधिक सक्षम करण्याच्या दृष्टीने प्रस्तावित निगडी (भक्ती शक्ती) ते चाकण मेट्रो (Metro) मार्गिकेच्या सविस्तर प्रकल्प अहवालाचे (डीपीआर)(DPR) सोमवारी सादरीकरण करण्यात आले. सुमारे ₹१२,९३७ कोटी खर्चाच्या या महत्त्वाकांक्षी प्रकल्पाअंतर्गत ४५.२९५ किलोमीटर लांबीच्या मार्गावर ३४ मेट्रो स्थानके उभारण्याचा प्रस्ताव आहे. हा मार्ग पुणे मेट्रोच्या (Pune Metro) टप्पाक्रमांक २ अंतर्गत विकसित करण्यात येणार आहे.

https://prahaar.in/2026/07/28/indian-railways-tatkal-ticket-booking-rules-to-change-from-august-1-new-token-system-to-be-implemented-at-railway-stations/

महामेट्रोचे व्यवस्थापकीय संचालक श्रावण हर्डीकर यांनी बैठकीत प्रकल्पाचा आराखडा सादर केला. यावेळी खासदार श्रीरंग बारणे, आमदार महेश लांडगे, शंकर जगताप, उमा खापरे, महापौर रवी लांडगे, उपमहापौर शर्मिला बाबर तसेच महापालिकेतील पदाधिकारी उपस्थित होते. हा डीपीआर (DPR) लवकरच महापालिकेच्या सर्वसाधारण सभेसमोर मंजुरीसाठी ठेवण्यात येणार आहे.

प्रस्तावित मार्गिका भक्ती शक्ती, वाकड चौक, नाशिक फाटा आणि संत तुकारामनगर या विद्यमान तसेच प्रस्तावित मेट्रो स्थानकांना जोडणार आहे. याशिवाय भक्ती शक्ती चौक, भुजबळ चौक, वल्लभनगर आणि मोशी येथे मल्टिमोडल ट्रान्सपोर्ट हब (Transport Hub) विकसित करण्याचाही आराखडा तयार करण्यात आला आहे. त्यामुळे मेट्रो (Metro), बस (Bus) आणि इतर सार्वजनिक वाहतूक सेवांमधील समन्वय अधिक प्रभावी होण्याची अपेक्षा आहे.

बैठकीदरम्यान भविष्यात तळवडेमार्गे निगडी-चाकण मेट्रोला जोडून शहरात ‘रिंग मेट्रो नेटवर्क’(Ring Metro Network) उभारण्याची संकल्पनाही मांडण्यात आली. वाढती लोकसंख्या, औद्योगिक विस्तार आणि भविष्यातील प्रवासी संख्या लक्षात घेऊन शहरातील मेट्रोचे जाळे अधिक व्यापक करण्यावर या आराखड्यात विशेष भर देण्यात आला आहे.