मुंबई : मुंबईतील बेस्ट (BEST) बस पुन्हा एकदा चर्चेत आली आहे. मात्र, यावेळी कारण अपघात नसून एका बस चालकाने शेवपुरी (Sev Puri) खाण्यासाठी भररस्त्यात बस थांबवल्याचा प्रकार आहे. या घटनेमुळे परिसरात मोठी वाहतूक कोंडी (Traffic Jam) झाली. यानंतर एका तरुणाने चालकाला जाब विचारला असता त्याच्याशी शिवीगाळ करण्यात आल्याचा आरोप आहे. या संपूर्ण घटनेचा व्हिडिओ (Video) सोशल मीडियावर व्हायरल (Viral) झाल्यानंतर बेस्ट प्रशासनाने संबंधित चालकाविरोधात कारवाईचे आदेश दिले आहेत.
ही घटना मुंबईतील मुलुंड (Mulund) येथील एम.जी. रोड (M.G. Road) परिसरात घडली. माहितीनुसार, बस चालकाने ३० रुपयांची शेवपुरी खाण्यासाठी भररस्त्यात तब्बल २० मिनिटांपेक्षा अधिक काळ BEST बस उभी ठेवली. त्यामुळे रस्त्यावर वाहनांच्या लांबच लांब रांगा लागून मोठी वाहतूक कोंडी झाली.
View this post on Instagram
https://prahaar.in/2026/07/11/mumbai-pune-rail-services-disrupted-st-corporation-offers-relief-with-a-welcome-decision-announcement-of-200-additional-bus-trips-on-the-mumbai-pune-route/
या कोंडीत अडकलेल्या एका तरुणाने चालकाला याबाबत जाब विचारला. त्यावेळी चालकाने, “जा तुझ्या बापाला दाखव, आईला दाखव आणि पोलिसांनाही दाखव, मी कुणालाही घाबरत नाही,” असे म्हणत शिवीगाळ केल्याचा आरोप करण्यात आला आहे. त्यानंतर बस चालकाने बस घेऊन तेथून निघून गेला. हा संपूर्ण प्रकार संबंधित तरुणाने आपल्या मोबाईलमध्ये रेकॉर्ड करून सोशल मीडियावर शेअर केला. त्यानंतर हा व्हिडिओ मोठ्या प्रमाणात व्हायरल झाला.
या व्हायरल व्हिडिओची गंभीर दखल घेत BEST प्रशासनाने मुलुंड आगार व्यवस्थापकाला संबंधित चालकाविरोधात योग्य ती शिस्तभंगाची कारवाई करण्याचे निर्देश दिले आहेत. बेस्टच्या जनसंपर्क अधिकारी सुचेता उतळे यांनी याबाबत माहिती दिली.
दरम्यान, मुंबईत बेस्ट बसच्या घटनांमुळे आधीच चर्चा सुरू असताना, आता केवळ ३० रुपयांच्या शेवपुरीसाठी भररस्त्यात बस थांबवल्याचा प्रकार समोर आल्याने प्रवासी आणि नागरिकांमध्ये संताप व्यक्त केला जात आहे.