चंद्रपूर : दारूच्या नशेत (Alcohol Intoxication) दुचाकी (Two-Wheeler) चालवणाऱ्या आई-वडिलांच्या निष्काळजीपणामुळे चार महिन्यांचे बाळ धावत्या बाईकवरून रस्त्यावर पडल्याची धक्कादायक घटना चंद्रपूर जिल्ह्यातील भिसी येथे घडली. विशेष म्हणजे, बाळ रस्त्यावर पडल्याचे त्या दोघांच्या तब्बल ४०० मीटरपर्यंत लक्षातच आले नाही. सुदैवाने, वाटसरू आणि पोलिसांच्या तत्परतेमुळे बाळाचा जीव वाचला.

https://prahaar.in/2026/06/28/a-grand-textile-production-center-from-the-viking-age-shedding-new-light-on-history-dating-back-thousands-of-years/

दारूच्या नशेत प्रवास, बाळ रस्त्यावर पडले

ही घटना बुधवारी रात्री भिसी बायपासवरील मौली ढाब्याजवळ घडली. फूलचंद राऊत आणि त्यांची पत्नी मीरा राऊत हे नागपूरजवळील नंदा येथून चिमूर येथे नातेवाईकांच्या घरी स्प्लेंडर मोटारसायकलवरून जात होते. त्यांच्यासोबत चार महिन्यांचा मुलगा आणि अडीच वर्षांची मुलगी होती. पोलिसांच्या माहितीनुसार, दोघांनीही मद्यपान (Drunk Driving) केले होते.

प्रवासादरम्यान चार महिन्यांचे बाळ आईच्या मांडीवर बसले होते. अचानक ते तिच्या मांडीवरून निसटून रस्त्यावर पडले. मात्र, दारूच्या नशेत असल्यामुळे आई-वडिलांना याची जाणीवच झाली नाही आणि ते जवळपास ४०० मीटर पुढे गेले.

https://prahaar.in/2026/06/28/late-night-panic-in-south-mumbai-underground-bmcs-cable-catches-fire-near-bhendi-bazaar-atmosphere-of-fear-in-the-area/

बाईक घसरली, तरीही बाळ पडल्याचे लक्षात आले नाही

रस्त्याची खराब अवस्था आणि नशेमुळे काही अंतरावर त्यांची दुचाकी घसरली. या अपघातात (Accident) दोघेही तसेच त्यांची अडीच वर्षांची मुलगी रस्त्यावर पडली. तरीही चार महिन्यांचे बाळ मागे रस्त्यावर पडले आहे, याची त्यांना कल्पना नव्हती.

वाटसरू आणि पोलिसांच्या तत्परतेने वाचला जीव

राष्ट्रीय महामार्गावरून जाणाऱ्या नागरिकांच्या लक्षात रस्त्यावर पडलेले बाळ आले. त्यांनी तात्काळ बाळाला सुरक्षित ठिकाणी नेऊन भिसी पोलिसांना माहिती दिली. तसेच काही अंतरावर एक जखमी जोडपे पडल्याचेही पोलिसांना सांगितले.

माहिती मिळताच पोलिसांनी घटनास्थळी धाव घेत बाळाला तातडीने रुग्णालयात (Hospital) दाखल केले. डॉक्टरांनी त्वरित उपचार (Treatment) केल्याने बाळाचा जीव वाचला. त्यानंतर जखमी आई-वडील आणि त्यांच्या मुलीलाही उपचारासाठी रुग्णालयात दाखल करण्यात आले.

https://prahaar.in/2026/06/28/kailash-mansarovar-yatra-2026-avoid-traveling-without-a-visa-for-the-kailash-mansarovar-yatra-ministry-of-external-affairs-issues-advisory-for-pilgrims/

दारू पिऊन वाहन चालवल्याप्रकरणी गुन्हा दाखल

स्टेशन हाऊस ऑफिसर मंगेश भोंगडे यांनी सांगितले की, फूलचंद आणि मीरा राऊत यांना एकूण आठ मुले आहेत. दारूच्या नशेत वाहन चालवणे आणि निष्काळजीपणामुळे ही घटना घडली. या प्रकरणी मद्यपान करून वाहन चालवण्याच्या (Drunk Driving Case) कायद्यानुसार दोघांविरुद्ध गुन्हा दाखल करण्यात आला आहे.

पोलिसांचे आवाहन

या घटनेत बाळ, त्याची बहीण आणि आई-वडील किरकोळ जखमी झाले असून सर्वांवर उपचार करण्यात आले आहेत. या घटनेनंतर पोलिसांनी नागरिकांना मद्यपान करून वाहन चालवू नये, तसेच लहान मुलांसोबत प्रवास करताना आवश्यक सुरक्षा (Safety) उपायांचे काटेकोरपणे पालन करण्याचे आवाहन केले आहे.