धुळे : अन्न, नागरी पुरवठा व ग्राहक संरक्षण विभागाच्या राज्य दक्षता पथकाने धुळे-सुरत महामार्गावर सुरू असलेल्या गॅस आणि डिझेल चोरीच्या मोठ्या रॅकेटचा पर्दाफाश केला आहे. पथकाने दोन दिवस गुप्त पाळत ठेवल्यानंतर ही कारवाई केली. पथकाने मारलेल्या या धाडीत सुमारे १ कोटी ५५ लाख ९५ हजार रुपयांचा मुद्देमाल जप्त करण्यात आला आहे.

ही कारवाई साक्री तालुक्यातील दहिवल गावाजवळ, सुरत-धुळे महामार्गावरील अन्नपूर्णा ढाब्याच्या मागील बाजूस आणि पार्श्वनाथ ढाब्यालगत करण्यात आली. राज्य दक्षता पथकाने अवैधरीत्या टँकरमधून गॅस व डिझेल काढून त्याचा साठा केला जात असल्याची माहिती मिळाल्यानंतर परिसरावर नजर ठेवली होती. चोरी सुरू असतानाच पथकाने छापा टाकत संपूर्ण कारवाई यशस्वी केली.

https://prahaar.in/2026/06/19/nitesh-rane-aaditya-thackeray-is-the-abhishek-banerjee-of-ubt/

कारवाईत गुजरातहून जळगावकडे जाणारा एलपीजी गॅस टँकर, त्यातील १७.४२ मेट्रिक टन गॅस, ३५ किलोलीटर डिझेलने भरलेला टँकर, बोलेरो पिकअप, छोटा ट्रक, १४० व्यावसायिक गॅस सिलिंडर, गॅस भरण्याची उपकरणे, वजनकाटे आणि डिझेल साठा जप्त करण्यात आला.

राज्य दक्षता पथकातील दीपेंद्र परुळेकर, अमोल बुरटे, पवन कुंबले, रवींद्र राठोड, राजेश सोरते, राहुल इंगळे, देवानंद इंगळे आणि राजीव भेले यांच्या पथकाने ही कारवाई केली. संबंधित आरोपींविरुद्ध कायदेशीर प्रक्रिया सुरू करण्यात आली असून, या प्रकरणाचा पुढील तपास सुरू आहे.

https://prahaar.in/2026/06/19/shraddha-kapoors-powerful-entry-in-stree-fans-get-goosebumps-watching-the-teaser/

महामार्गालगत सुरू असलेल्या या अवैध धंद्यामुळे शासनाच्या महसुलाला फटका बसत होता. तसेच एलपीजी गॅसची बेकायदेशीर भराई केल्याने मोठा अपघात किंवा स्फोट होण्याचा धोका निर्माण झाला होता. त्यामुळे राज्य दक्षता पथकाच्या या कारवाईचे नागरिकांकडून स्वागत होत असून, अशा अवैध व्यवसायांवर अधिक कठोर कारवाईची मागणीही जोर धरू लागली आहे.