माजी मंत्री धर्मराव बाबा आत्राम; १२ डिसेंबरआधी प्रवेश प्रक्रिया पूर्ण होणार

मुंबई : उपमुख्यमंत्री एकनाथ शिंदे (Eknath Shinde) यांनी उबाठा पक्षाला खिंडार पाडत ‘ऑपरेशन टायगर’ (Operation Tiger) यशस्वी केल्यानंतर आता राज्याच्या राजकारणात आणखी एका भूकंपाचे संकेत मिळत आहेत. राष्ट्रवादी काँग्रेस (अजित पवार) पक्षाचे ज्येष्ठ नेते आणि माजी मंत्री धर्मराव बाबा आत्राम यांनी शरद पवार गटाबाबत खळबळजनक दावा केला आहे. “आम्हाला कोणतेही ऑपरेशन राबवण्याची गरज नाही, पण शरद पवार गटाचे (तुतारी) कमीत कमी ५ विद्यमान खासदार निधी आणि विकासकामांसाठी स्वतःहून घड्याळाची साथ देण्यास इच्छुक आहेत,” असे वक्तव्य आत्राम यांनी केले आहे.

https://prahaar.in/2026/06/19/nitesh-rane-aaditya-thackeray-is-the-abhishek-banerjee-of-ubt/

“आम्ही ‘ऑपरेशन घड्याळ’ वगैरे काहीही करणार नाही. पण प्रत्येक खासदाराला त्याच्या मतदारसंघातील विकासकामे मार्गी लावणे गरजेचे असते. त्यामुळे त्यांचे ऑपरेशन तुतारीवाले स्वतःच करतील. माझा अंदाज आहे की, तुतारीचे ५ खासदार आमच्या राष्ट्रवादी काँग्रेस पक्षात प्रवेश करू शकतात. मला वाटते की १२ डिसेंबरपर्यंत हे खासदार आमच्याकडे अधिकृतपणे आलेले दिसतील,” असा दावा आत्राम यांनी केला.

https://prahaar.in/2026/06/19/shraddha-kapoors-powerful-entry-in-stree-fans-get-goosebumps-watching-the-teaser/

काँग्रेसचेही काही खासदार संपर्कात

आत्राम म्हणाले, “उपमुख्यमंत्री सुनेत्रा पवार यांच्या खंबीर नेतृत्वावर लोकांचा आणि लोकप्रतिनिधींचा विश्वास आणखी वाढला आहे. काही माजी खासदारांसह विद्यमान खासदारही आमच्या पक्षात येण्यास उत्सुक आहेत. केवळ तुतारीच नव्हे, तर काँग्रेसचेही काही खासदार आमच्या संपर्कात असून ते पक्षात येण्यास इच्छुक आहेत. सर्वांना आपल्या भागात मोठ्या प्रमाणावर निधी आणि विकासकामे हवी आहेत. आपण निवडून आलो आहोत तर लोकांची कामे झाली पाहिजेत, याच अपेक्षेने हे लोक आमच्याकडे येतील”, असे आत्राम यांनी नमूद केले.

https://prahaar.in/2026/06/19/navnath-ban-sanjay-raut-should-speak-about-aurangzebs-history/

धैर्यशील मोहिते पाटलांनी दावा फेटाळला

धर्मराव बाबा आत्राम यांनी केलेल्या या दाव्यावर शरद पवार गटाकडून तातडीने प्रत्युत्तर देण्यात आले. राष्ट्रवादी काँग्रेस (शरद पवार) पक्षाचे खासदार धैर्यशील मोहिते पाटील म्हणाले, “राष्ट्रवादी काँग्रेस (शरद पवार) पक्षाचा एकही खासदार फुटणार नाही, आमची फळी पूर्णपणे मजबूत आहे. मात्र, इतर दुसऱ्या पक्षांबाबत काय सुरू आहे, यावर मी काहीही बोलणार नाही.”