मुंबई (प्रतिनिधी) : शुक्रवारपासून मुंबई महापालिकेचे व्हॉट्सअॅप चॅट-बॉट सुरू झाले आहे. अशी सुविधा देणारी मुंबई महापालिका ही देशातील पहिली पालिका ठरली असून या सुविधेचे लोकार्पण मुख्यमंत्री उद्धव ठाकरे यांच्या हस्ते शुक्रवारी झाले. ‘व्हॉट्सअॅप चॅट-बॉट’द्वारे जनतेला ८० हून अधिक सुविधा घरबसल्या उपलब्ध करून देण्यात येत आहेत.
व्हॉट्सअॅप चॅट-बॉट सुविधेमुळे नागरिकांना सगळी माहिती घरबसल्या मिळणार असून महापालिका, प्रशासन या यंत्रणांशी थेट संवाद साधता येणार आहे. तसेच बृहन्मुंबई महानगरपालिकेची ‘व्हॉट्सअप चॅट बॉट’ ही सुविधा ८९९९२२८९९९ या क्रमांकावर उपलब्ध असून या क्रमांकावर मराठीमध्ये ‘नमस्कार’ आणि इंग्रजीमध्ये ‘नमस्ते किंवा हाय’ असा संदेश पाठविल्यानंतर महानगरपालिकेच्या बोधचिन्हासहीत अधिकृत उत्तर प्राप्त होते. आपल्या आवश्यकतेनुसार नागरिकांद्वारे जे-जे पर्याय निवडले जातील, त्या-त्या पर्यायानुसार तब्बल ८० सेवा-सुविधांविषयीची माहिती नागरिकांना तत्काळ उपलब्ध होते.
यामध्ये संबंधीत पत्ते, संपर्क क्रमांक, संक्षिप्त माहिती यासारख्या बाबींचा समावेश असून या सुविधेतंर्गत उपलब्ध होणाऱ्या ८० सेवा-सुविधांविषयीची माहिती ही ‘लोकेशन’ आधारित पद्धतीने उपलब्ध होत आहे. एखाद्या व्यक्तीच्या ठिकाणाजवळ असणारे महानगरपालिका दवाखाने – रुग्णालये, कोविड केअर सेंटर, मनपा शाळा, उद्याने, पर्यटन स्थळे, अग्निशमन केंद्रे इत्यादी बाबींची माहिती तत्काळ उपलब्ध होणार असून या सुविधेद्वारे तक्रार वा सूचना करण्याची सेवा उपलब्ध आहे. विशेष म्हणजे महानगरपालिकेच्या विविध ऑनलाईन सेवा-सुविधांशी संबंधीत अर्ज करण्याची सुविधा उपलब्ध आहे.