मीरा रोड (वार्ताहर) :- मीरा-भाईंदर महानगरपालिका प्रभाग समिती क्र. ०४ कार्यक्षेत्रातील गोल्डन नेस्ट ते काशीमीरा महामार्गालगत फूटपाथवरील अतिक्रमणे यांच्यावर कारवाई करण्यात आल्यानंतर कणकिया, तिवारी कॉलेज समोर मोकळया जागेत असणाऱ्या झोपड्या-गोदामे महानगर पालिकेकडून जमीनदोस्त करण्यात आल्या. यावेळी एकूण २३५ झोपड्या, ०४ तबेले, ०४ मंडप डेकोरेटर शेड, ०६ प्लास्टिक भंगारचे गोडाऊन यांचेवर तोडक कारवाई करण्यात आली असून सर्व काही जमीनदोस्त करण्यात आले आहे.
एल.आर.तिवारी कॉलेज समोर कणकिया, सर्वे क्र २५५ या मोकळया जागेत गेल्या काही वर्षांपासून अनधिकृत रित्या झोपडया बांधून आपले वास्तव्य करणाऱ्या तशेच मोकळया जागेत गोदाम व तबेले चालवणाऱ्यांच्या संख्येत वाढ झाली होती. त्यांना विज पुरवठा देखील केला जात होता. अशा अनधिकृत झोपडपट्टीवर कारवाई करण्यात यावी याकरता मीरा-भाईंदर शहरातील अनेक समाजसेवक स्वाभिमान संघटनेचे जिल्हा अध्यक्ष मनोज राणे यांनी गेल्या ६ महिन्यांपासून याचा पाठ पुरावा केला होता, मात्र पालिकेला उशिरा जाग आल्याने कारवाईला उशिर झाला असल्याचे राणे यांनी सांगितले आहे.
गुरुवारी सकाळी ११ च्या सुमारास ०१ पोकलेन,०१ जेसीबी, ०२ कर्षण वाहने यांचे सहाय्याने कारवाई करण्यात आली. तसेच १५ पशु (गाई, म्हशी) कोंडवाड्यात सोडण्यात आल्या आहेत. सदरची कारवाई आयुक्त दिलीप ढोले यांच्या आदेशानुसार अतिरिक्त आयुक्त विजयकुमार म्हसाळ यांचे मार्गदर्शनाखाली उपायुक्त मारुती गायकवाड यांचे मार्गदर्शन, अतिक्रमण विभाग प्रमुख नरेंद्र चव्हाण, सहा. आयुक्त कांचन गायकवाड, पशू वैद्यकीय अधिकारी डॉ. विक्रम निरातले, कनिष्ठ अभियंता. विकास शेळके, कनिष्ठ अभियंता सुदर्शन काळे,कनिष्ठ अभियंता योगेश भोईर , कनिष्ठ अभियंता वैभव पेडवी , कनिष्ठ अभियंता शुभम पाटील, कनिष्ठ अभियंता वैभव कुलथे, लिपिक महेंद्र गावंड, फेरीवाला पथक प्रमुख रंजीत भामरे यांच्या उपस्थितीत करण्यात आली आहे.