सिन्नर : दातली येथील जिल्हा परिषद प्राथमिक शाळेत आजी-आजोबा दिवस अतिशय उत्साहात साजरा करण्यात आला. यावेळी शाळेच्या वतीने आजी आजोबांचे गुलाब पुष्प देऊन स्वागत करण्यात आले. विद्यार्थ्यांनी आजी आजोबा विषयी मनोगत व्यक्त केले तसेच आजी आजोबांचे औक्षण व पाद्यपूजन आणि दर्शन घेतले. त्यानंतर संगीत खुर्ची स्पर्धा, चमचा लिंबू स्पर्धा, बकेट मध्ये चेंडू फेकणे आदी खेळांचा आजी आजोबांनी मनमुराद आनंद लुटला.
औक्षण व पाद्य पूजन करताना काहींना गहिवरून आले. मनोगत व्यक्त करताना आम्ही आमच्या शालेय जीवनात गेल्याचा भास झाला असेही काहीजण म्हणाले. मुलांना असेच संस्कार देत चला, शाळेसाठी काही कमतरता भासल्यास आम्ही नक्कीच पुर्ण करण्याचा प्रयत्न करू असे म्हणत शिक्षकांचे आभार मानले. अल्पोपहाराने कार्यक्रमाची सांगता झाली. शाळेतील शिक्षक अमृत नांद्रे यांनी कार्यक्रमाचे सुत्रसंचलन केले.
“शाळेतील अनुभव व आजी-आजोबांचे अनुभव त्यांच्या हितगूजमधून मिळणारी माहिती, गोष्टी पाल्यांच्या जडणघडणीसाठी पोषक ठरतात. त्यामुळे शाळांमध्ये विविध उपक्रमांच्या माध्यमातून आजी-आजोबांना शाळेत आमंत्रित करून मुलांशी संवाद, खेळ व गप्पागोष्टी, तसेच सांस्कृतिक कार्यक्रमांच्या माध्यमातून ओळख व्हावी, यासाठी आजी-आजोबा दिवस शाळेत साजरा करण्यात आला.”