मुंबई (प्रतिनिधी) : दादर येथील छत्रपती शिवाजी महाराज पार्कच्या देखभाल आणि दुरुस्तीसाठी पहिल्यांदाच पालिकेने कंत्राटदार नेमला आहे. मैदानावर असलेली धूळ रोखण्यासाठी, पाणी मारण्यासाठी आणि मैदानातील हरितपट्टा राखण्यासाठी कंत्राटदाराची नेमणूक केली आहे.
दरम्यान मैदानातील धुळीमुळे परिसरातील स्थानिकांना त्रास होत होता. पावसाळ्यात मैदानात पाणी साचल्यामुळे खेळता येत नव्हते. या सगळ्याचा विचार करून पालिकेने मैदानाची देखभाल करण्यासाठी कंत्राटदाराची नियुक्ती केली आहे. यासाठी पालिकेने निविदा मागवल्या होत्या. यात कपूर ट्रेडिंग ही कंपनी पात्र ठरली आहे. अंदाजित रकमेपेक्षा उणे २१ टक्के दर या कंपनीने आकारला आहे, तर रेन वॉटर हार्वेस्टिंगच्या माध्यमातून मैदान धूळमुक्त केले जाणार आहे. या मैदानात रेनवॉटरसह पर्जन्य जलवाहिनी टाकण्यात आली आहे.
गवताळ भाग तयार करण्यात आल्याने, येत्या एप्रिल आणि मेपर्यंत संपूर्ण शिवाजी पार्क मैदानातील गवत चांगल्या प्रकारे वाढले जाणार आहे. पार्काचे परिरक्षण आणि देखभाल करण्यासाठी या कंपनीला तीन वर्षांकरता हे कंत्राट देण्यात आले असून १२ माळी आणि १२ सफाई कामगार काम करणार आहेत. या कंत्राटात मैदानाला पाणी मारणे, पंप सुरू करणे तसेच मैदान परिसराची स्वच्छता राखण्यासह विविध कार्यक्रम व सभांच्या आयोजनानंतर तेथे स्वच्छता राखण्याची जबाबदारी संबंधित कंपनीवर असेल.