फिरोजपूर : पंजाबच्या फिरोजपूर जिल्ह्यात काँग्रेसच्या नगरसेवकाची गोळ्या झाडून हत्या करण्यात आल्याची धक्कादायक घटना समोर आली आहे. गुरप्रीत सिंग गोपी असे मृत काँग्रेस नेत्याचे नाव आहे. ते आपल्या सहकाऱ्यासोबत दुचाकीवरून जात असताना कारमधून आलेल्या हल्लेखोरांनी त्यांच्यावर गोळीबार केला. या हल्ल्यात त्यांचा जागीच मृत्यू झाला. या घटनेनंतर परिसरात खळबळ उडाली असून पोलिसांनी तपास सुरू केला आहे. (Punjab Crime)
ही घटना 29 ऑगस्ट रोजी पंजाबमधील ममडोट शहरात घडली. गुरप्रीत सिंग गोपी हे सहकारी हरप्रीत यांच्यासोबत दुचाकीवरून जात होते. त्यांचे काही मित्रही कारमधून त्यांच्या मागे येत होते. त्याचवेळी एका कारमधून आलेल्या सशस्त्र हल्लेखोरांनी त्यांच्या दुचाकीचा पाठलाग सुरू केला. काही अंतर गेल्यानंतर हल्लेखोरांनी दुचाकीवर गोळीबार केला. यात गुरप्रीत सिंग गोपी यांचा मृत्यू झाला.
हल्लेखोरांनी त्यांच्या मित्रांच्या कारवरही गोळ्या झाडल्याची माहिती समोर आली आहे. त्यानंतर आरोपी घटनास्थळावरून फरार झाले. घटनेची माहिती मिळताच पोलिसांनी घटनास्थळी धाव घेत तपास सुरू केला. (Congress Leader Murder)
https://www.prahaar.in/2026/08/30/heart-wrenching-how-a-pregnant-girlfriend-was-eliminated-one-plot-by-the-boyfriend-and-it-was-all-over-police-action-causes-a-stir/
पोलिसांच्या प्राथमिक तपासानुसार, या हत्येमागे जुन्या वैमनस्याचा संशय आहे. दोन गटांमधील वादातून हा हल्ला झाला असण्याची शक्यता पोलिसांकडून तपासली जात आहे. तसेच स्थानिक राजकीय किंवा निवडणुकीशी संबंधित वादाचा या हत्येशी संबंध आहे का, याचाही तपास सुरू आहे. (Gurpreet Singh Gopi)
फिरोजपूरचे वरिष्ठ पोलीस अधीक्षक भूपिंदर सिंग सिद्धू यांनी दिलेल्या माहितीनुसार, हल्लेखोरांची ओळख पटली आहे. मुख्य आरोपी सराईत गुन्हेगार असून त्याच्याविरोधात यापूर्वीही विविध गुन्हे दाखल असल्याचे पोलिसांनी सांगितले. आरोपींच्या अटकेसाठी पोलिसांनी विशेष पथके तयार केली असून त्यांच्या संभाव्य ठिकाणी शोधमोहीम सुरू आहे. पंजाबमध्ये पुढील वर्षी विधानसभा निवडणुका होणार असल्याने या घटनेमुळे कायदा आणि सुव्यवस्थेवरही प्रश्न उपस्थित झाले आहेत. ( Political Crime)