ST bus accident : रत्नागिरीत एसटी बसची मोटारीला धडक; तिघे जखमी

रत्नागिरी : केळवली फाटा (ता. राजापूर) येथील जामदे पुलाजवळ एसटी बसने स्विफ्ट डिझायर कारला जोरदार धडक दिल्याने अपघातात तिघे जखमी झाले.अपघातानंतर मोटार काही अंतरापर्यंत फरपटत गेली. अपघातात दोन्ही वाहनांचे मोठ्या प्रमाणात नुकसान झाले आहे. मोटारचालकाने प्रसंगावधान राखल्याने मोठी दुर्घटना टळली. आज सकाळी सुमारे ७ वाजण्याच्या सुमारास हा अपघात झाला. कारचालक अमित रमेश साटम (रा. शिरगाव, ता. देवगड) आपल्या मित्रांसह आपल्या गावाहून मोटारीने (क्र. एमएच ०७ बीजी ९०९७) केळवली-पाचल मार्गे अणुस्कुराच्या दिशेने पुण्याकडे जात होते. त्यावेळी वैभववाडीच्या दिशेने येणारी कणकवली आगाराची भुईबावडा-रिंगेवाडी-खारेपाटण एसटी बस (क्र. एमएच २० बीएल ३०७९) केळवली फाट्यावरील जामदे पुलाजवळ आली.पोलिसांनी दिलेल्या माहितीनुसार, वळणाच्या रस्त्यावर एसटी बसची मोटारीला धडक बसली. चालक गणपती भाऊसाहेब जाधव (वय ४७) यांच्या ताब्यातील एसटी बसने समोरून येणाऱ्या कारला जोरदार धडक दिली. धडकेनंतर कार बससोबत काही अंतर फरपटत गेली.

या अपघातात कारमधील युधीराज भिकाजी राणे (वय ३२), विघ्नेश रामदास म्हाळवदे (वय २५) आणि राज रामदास म्हाळवदे (वय २२) हे तिघे जखमी झाले. तिघेही शिरगाव (ता. देवगड, जि. सिंधुदुर्ग) येथील रहिवासी आहेत. जखमींवर प्राथमिक आरोग्य केंद्रात उपचार करण्यात आले. अपघाताची माहिती मिळताच राजापूर पोलीस निरीक्षक अमित यादव व पोलीस हेडकॉन्स्टेबल रहिम मुजावर , सहायक पोलिस निरीक्षक दीपज्योती पाटील यांनी घटनास्थळी धाव घेतली. राजापूर एसटी आगाराच्या आगारप्रमुख काव्या पेडणेकर व वाहतूक नियंत्रक अजय सिडाम यांनीही घटनास्थळी भेट दिली. तसेच सिंधुदुर्गचे विभागीय वाहतूक अधीक्षक नीलेश लाड यांनी घटनास्थळी पाहणी केली.या प्रकरणी कारचालक अमित साटम यांनी दिलेल्या तक्रारीवरून राजापूर पोलिसांनी एसटी चालक गणपती जाधव यांच्याविरोधात गुन्हा दाखल केला आहे.