मुंबई : चर्चगेट ते बोरिवली दरम्यान धावणाऱ्या एका लोकल ट्रेनमध्ये किरकोळ वादातून एका प्रवाशाला धावत्या डब्यातून खाली ढकलून दिल्याची खळबळजनक घटना समोर आली आहे. वांद्रे खाडीच्या पुलावर ट्रेन आलेली असताना हा भयानक प्रकार घडला असून या दुर्घटनेत खाली पडलेला प्रवासी गंभीर जखमी झाला आहे. त्याची प्रकृती सध्या अत्यंत चिंताजनक आहे. (Mumbai Local)
समोर आलेल्या माहितीच्या आधारे, ही घटना लोकल ट्रेनच्या दिव्यांगाच्या डब्यात घडली. ट्रेन चर्चगेटवरून बोरिवलीच्या दिशेने जात असताना, वांद्रे खाडीजवळ अचानक दोन प्रवाशांमध्ये काही कारणावरून किरकोळ वाद सुरू झाला. हा किरकोळ वाटणारा वाद पाहता पाहता विकोपाला गेला आणि चिडलेल्या एका प्रवाशाने दुसऱ्या व्यक्तीला थेट धावत्या ट्रेनमधून बाहेर धक्का दिला. ट्रेनचा वेग जास्त असल्यामुळे आणि खाली खाडीचा भाग व ट्रॅक असल्यामुळे संबंधित व्यक्ती खाली पडल्याने अत्यंत गंभीर जखमी झाली.
या घटनेची माहिती मिळताच वांद्रे लोहमार्ग पोलिसांनी (GRP) तात्काळ घटनास्थळी धाव घेतली. गंभीर जखमी झालेल्या प्रवाशाला तातडीने वांद्रे पश्चिमेकडील भाभा रुग्णालयात उपचारासाठी दाखल करण्यात आले. डॉक्टरांनी दिलेल्या माहितीनुसार, रुग्णाची प्रकृती चिंताजनक असून त्याच्यावर अतिदक्षता विभागात उपचार सुरू आहेत.(Mumbai Local)
दरम्यान, प्रवाशाला धक्का देऊन जीवे मारण्याचा प्रयत्न करू पाहणाऱ्या आरोपीला वांद्रे लोहमार्ग पोलिसांनी ताब्यात घेतले आहे. पोलिसांकडून सध्या या आरोपीची सखोल चौकशी सुरू असून, हा वाद कशावरून झाला होता व यामागची नेमकी कारणं काय आहेत, याचा शोध घेतला जात आहे. दिव्यांगासाठी राखीव असलेल्या डब्यात अशा प्रकारे हिंसक घटना घडल्यामुळे पश्चिम रेल्वेच्या प्रवाशांमध्ये भीती पसरली आहे. रेल्वे पोलिसांकडून डब्यांमधील सुरक्षेचा मुद्दा पुन्हा एकदा ऐरणीवर आला आहे. (Mumbai Local)
