Mira Road : स्कूल व्हॅन रस्त्यावरून जात असताना मेट्रोचा स्लॅब कोसळला, आणि...

मिरा रोड : मुंबई आणि आसपासच्या शहरांमध्ये मेट्रोशी संबंधित कामं प्रगतीपथावर आहेत. मेट्रोच्या कामांमुळे काही ठिकाणी वाहतुकीची कोंडी होत आहे. पण काही काळानंतर प्रश्न सुटेल या आशेवर राहून नागरिक तक्रार करणे टाळत आहेत. या अशा वातावरणात एक धक्कादायक घटना घडली आहे. यामुळे मेट्रोचे काम करताना केल्या जाणाऱ्या खबरदारीच्या उपायांविषयी प्रश्न उपस्थित होऊ लागले आहेत. ताजी घटना मिरा रोड येथील गोल्डन नेस्ट परिसरातील आहे. या भागात मेट्रोचे काम सुरू असताना दुर्घटना झाली.

मिरा रोड येथील गोल्डन नेस्ट परिसरात मेट्रोचे काम सुरू असताना स्लॅब कोसळला. खाली रस्त्यावरून वाहतूक वेगाने सुरू असताना ही दुर्घटना घडली. जमिनीवर पडलेल्या स्लॅबचा मोठा आवाज ऐकल्यामुळे अनेकजण घाबरले. परिसरात भीतीचे वातावरण निर्माण झाले. अनेकांनी घटनास्थळाकडे धाव घेऊन स्लॅबचे तुकडे रस्त्याच्या कडेला ढकलण्यास मदत केली. घटनेची माहिती मिळताच स्थानिक पोलीस घटनास्थळी पोहोचले. स्लॅबचे तुकडे एका बाजूला केल्यानंतर पोलीस बंदोबस्तात टप्प्याटप्प्याने वाहतूक पुन्हा सुरू करण्यात आली.

स्कूल व्हॅनचं काय झालं ?

रस्त्यावरून स्कूल व्हॅन जात असताना स्लॅबचे तुकडे रस्त्यावर पडून विखुरले. अचानक घडलेल्या या घटनेमुळे स्कूलव्हॅन चालकाला वाहन सावरण्याची पुरेशी संधीच मिळाली नाही. स्लॅबच्या एका छोट्या तुकड्यावरून स्कूलव्हॅन वेगाने पुढे गेली. यामुळे स्कूलव्हॅनचे टायर पंक्चर झाले. MMRDA प्रशासनाने या वृत्ताला दुजोरा दिला आहे. तसेच दुर्घटनेप्रकरणी कंत्राटदारा विरोधात हलगर्जीपणा केल्याचा ठपका ठेवून कारवाई केली आहे. प्रकल्पाचे कंत्राटदार आणि त्यांचे सहाय्यक असलेले अभियांत्रिकी कंत्राटदार या दोन्ही कंपन्यांच्या विरोधात दंडात्मक कारवाई करण्यात आली आहे. MMRDA ने दिलेल्या माहितीनुसार प्रकल्पाचे कंत्राटदार, जे. कुमार इन्फ्राप्रोजेक्ट्स लि. (जेकेआयएल), यांच्यावर १० कोटी रुपयांचा दंड आकारण्यात आला आहे, तर आर्किटेक्चरल फिनिशिंग कंत्राटदार, एन. ए. गजानन, यांना १.५ कोटी रुपयांचा दंड ठोठावण्यात आला आहे. प्रकल्पाचे जनरल कन्सल्टंट, सिस्ट्रा-सीईजी, यांनाही १ कोटी रुपयांचा दंड ठोठावण्यात आला आहे.