YouTube च्या नियमात मोठे बदल! आता नवीन क्रिएटर्ससाठी कमाईचा मार्ग होणार आणखी कठीण

नवी दिल्ली : युट्यूब (YouTube) वरून कमाई करण्याचे स्वप्न पाहणाऱ्या नवीन क्रिएटर्ससाठी महत्त्वाची बातमी आहे. प्लॅटफॉर्मकडून जाहिरात आणि प्रीमियम महसूल मिळवण्यासाठी आवश्यक असलेली व्ह्यूअरशिपची अट दुप्पट केली जाणार असल्याची माहिती समोर आली आहे. त्यामुळे नव्या क्रिएटर्सना YouTube Partner Program अंतर्गत कमाई सुरू करण्यासाठी पूर्वीपेक्षा अधिक व्ह्यूज आणि वॉच टाइम मिळवावा लागणार आहे.

फेब्रुवारीपासून नवे नियम लागू?

समोर आलेल्या माहितीनुसार, १ फेब्रुवारीपासून नवीन क्रिएटर्सना जाहिरात आणि YouTube Premium महसुलासाठी पात्र ठरण्यासाठी अधिक कठीण निकष पूर्ण करावे लागतील. यामध्ये क्रिएटर्सना १२ महिन्यांच्या कालावधीत ८,००० वॉच अवर्स पूर्ण करावे लागतील. याशिवाय Shorts तयार करणाऱ्या क्रिएटर्ससाठी ९० दिवसांत २० दशलक्ष Shorts views मिळवण्याची अट ठेवण्यात येणार असल्याचे सांगितले जात आहे.

Shorts Creators समोरही मोठं आव्हान :

Shortsच्या माध्यमातून प्रेक्षकांपर्यंत पोहोचणाऱ्या क्रिएटर्ससाठी ९० दिवसांत २० दशलक्ष म्हणजेच २ कोटी व्ह्यूज मिळवणे हे मोठे आव्हान ठरू शकते. त्यामुळे केवळ सातत्याने व्हिडीओ अपलोड करण्याऐवजी कंटेंटची गुणवत्ता, प्रेक्षकांची पसंती आणि व्हिडीओची पोहोच वाढवण्यावर क्रिएटर्सना अधिक भर द्यावा लागेल. तर दुसरीकडे, लाँग-फॉर्म व्हिडीओ तयार करणाऱ्या क्रिएटर्ससाठी १२ महिन्यांत ८,००० वॉच अवर्स पूर्ण करणे आवश्यक ठरणार आहे. यामुळे नवीन चॅनेल सुरू करणाऱ्यांना कमाईच्या टप्प्यापर्यंत पोहोचण्यासाठी अधिक मेहनत घ्यावी लागणार आहे.

नवीन क्रिएटर्सवर काय परिणाम होणार?

या बदलाचा सर्वाधिक परिणाम नव्याने YouTube चॅनेल सुरू करणाऱ्या क्रिएटर्सवर होण्याची शक्यता आहे. विशेषतः मनोरंजन, शिक्षण, टेक्नॉलॉजी, गेमिंग आणि शॉर्ट्स कंटेंट तयार करणाऱ्या क्रिएटर्सना मोठ्या प्रमाणात व्ह्यूअरशिप मिळवण्याचे आव्हान असेल. अधिक व्ह्यूज मिळवण्यासाठी क्रिएटर्सना ट्रेंडिंग विषय, आकर्षक थंबनेल, दमदार टायटल, नियमित अपलोड आणि प्रेक्षकांना शेवटपर्यंत जोडून ठेवणारा कंटेंट यावर लक्ष केंद्रित करावे लागेल.

कमाईसाठी आता फक्त चॅनेल सुरू करणे पुरेसे नाही :

YouTube वर चॅनेल सुरू केल्यानंतर लगेच कमाई सुरू होत नाही. प्लॅटफॉर्मच्या मोनेटायझेशन निकषांची पूर्तता केल्यानंतरच जाहिराती आणि इतर माध्यमातून महसूल मिळवण्याचा मार्ग खुला होतो. त्यामुळे नव्या नियमांमुळे YouTube वरून कमाई करू इच्छिणाऱ्या नव्या क्रिएटर्ससाठी स्पर्धा आणखी वाढणार असल्याचे चित्र आहे.