IAF NEWS : हनीट्रॅपमध्ये अडकलेल्या विंग कमांडरला अटक

नवी दिल्ली : एका पाकिस्तानी गुप्तचर अधिकाऱ्याला संवेदनशील माहिती दिल्याप्रकरणी भारतीय वायु दलाच्या एका विंग कमांडरला अटक करण्यात आली आहे. या अधिकाऱ्याविरोधात दिल्ली पोलिसांनी आरोपपत्र दाखल केले आहे.

विंग कमांडर संवेदनशील माहिती देशाच्या शत्रूला पुरवत असल्याचा संशय आल्यामुळे मागील काही आठवड्यांपासून त्याच्यावर पालयत ठेवली जात होती. अखेर ठोस पुरावे हाती येताच या अधिकाऱ्याला अटक करण्यात आली आणि आता त्याच्या विरोधात आरोपपत्रही दाखल करण्यात आले आहे. विंग कमांडरला ३० मे २०२६ रोजी अटक केली आणि त्याच्या विरोधात दिल्ली पोलिसांनी आरोपपत्र दाखल केले, असे भारतीय वायु दलाच्या प्रवक्त्याने सांगितले.

अटकेतील आरोपी अधिकारी हनीट्रॅपमध्ये अडकला होता. या अधिकाऱ्याने सोशल मीडियातून एका मुलीशी ओळख करून घेतली. या मुलीमुळेच हनीट्रॅपमध्ये अडकलेल्या अधिकाऱ्याने संवेदनशील माहिती दिली. संबंधित अधिकाऱ्याने हनीट्रॅपमध्ये अडकल्यानंतर काही इलेक्ट्रॉनिक उपकरणांच्या मदतीने संवेदनशील माहिती मिळवली आणि ती पाकिस्तानी गुप्तचर अधिकाऱ्याला दिली. तसेच दिल्ली एनसीआर आणि पश्चिम तळासाठी महत्त्वाच्या जबाबदाऱ्या हाताळताना संवेदनशील माहिती मिळवून ती पाकिस्तानी गुप्तचराला दिली असल्याचेही तपासातून समजले आहे. यामुळे अधिकाऱ्याविरोधात ऑफिशिअल सीक्रेट अॅक्ट अंतर्गत गुन्हा नोंदविण्यात आला आहे.

वैयक्तिक अडचणीत असताना अधिकारी सोशल मीडियातून मुलीच्या संपर्कात आला. पुढे अधिकारी आणि मुलगी यांच्यातील संपर्क फोन कॉल वरून व्हिडीओ कॉलपर्यंत पोहोचला आणि अधिकारी हनीट्रॅपमध्ये अडकला. यानंतर आरोपीने फोटो, व्हिडीओ, डॉक्युमेंट (कागदपत्रे) अशा स्वरुपात संवेदनशील माहिती पाकिस्तानी गुप्तचर अधिकाऱ्याला दिली. संवेदनशील माहिती चोरण्यासाठी अधिकाऱ्याने इलेक्ट्रॉनिक उपकरणांचा तसेच हॅकिंगच्या तंत्राचाही तज्ज्ञांच्या मदतीने वापर केल्याचे तपासात समजले आहे. अटकेतील अधिकाऱ्याने सेवेत असताना निवडक सहकाऱ्यांच्या फोनला स्पायवेअर उपकरण लावून संवेदनशील माहिती मिळवली असल्याचेही समजले आहे. यामुळे अधिकाऱ्याविरोधात कायदेशीर कारवाई सुरू केल्याचे भारतीय वायु दलाच्या प्रवक्त्याने सांगितले.