Hrithik Roshan : ऑफिससाठी जागा भाड्याने देऊन अभिनेता हृतिक रोशन कमावतो अफाट पैसा

मुंबई : बॉलिवूडचे अनेक कलाकार सिनेसृष्टीतील अस्थिरतेचा विचार करून आर्थिक सुरक्षेसाठी विविध क्षेत्रांमध्ये गुंतवणूक करत आहेत. अभिनेता हृतिक रोशनसह काही कलाकारांनी आता मोठमोठ्या कार्यालयीन जागांमध्ये (Office Space) गुंतवणूक करायला सुरुवात केली आहे. कार्यालयीन जागा विकत घेऊन ती भाड्याने देऊन त्यातून निश्चित असे उत्पन्न कमावणे हा बड्या कलाकारांसाठी नवा व्यवसाय झाला आहे.

हृतिक रोशनने मुंबईच्या पश्चिम उपनगरात कार्यालयीन वापरासाठी (Office Space) सहा हजार चौरसफुटांची जागा खरेदी केली आहे. अंधेरी पश्चिमेला न्यू लिंक रोडवर नीलकमल बिझनेस पार्कमध्ये ही जागा आहे. ही कार्यालयीन वापराची जागा हृतिक रोशनने आता भाड्याने दिली आहे. यात एकूण सात युनिट्स आहेत. तसेच बिझनेस पार्कमध्ये कार पार्किंगच्या सात जागा पण हृतिककडे आहेत. हृतिकने ही पार्किंग स्पेस आणि ऑफिस स्पेस भाड्याने देऊन निश्चित असे उत्पन्न कमावण्यास सुरुवात केली आहे.

कागदपत्रांतील नोंदीनुसार हृतिक रोशनकडून भाड्याने घेतलेल्या कार्यालयीन जागेसाठी भाडेकरूने ६८ लाख रुपयांची सुरक्षा ठेवा अर्थात सिक्युरिटी डीपॉझिट दिले आहे. भाडेकरार अर्थात लीज अॅग्रीमेंट २९ जून २०२६ रोजी रजिस्टर्ड झाले आहे. करार १ एप्रिल २०२६ पासून ३१ मार्च २०३१ पर्यंत चालणार आहे. करारांतर्गत भाडेकरू दरमहा १७ लाख रुपये अशा पद्धतीने पुढील तीन वर्ष आणि नंतरच्या दोन वर्षांसाठी दरमहा १९.५५ लाख रुपये भाडे म्हणून देणार आहे. या भाडेकरारामुळे हृतिक रोशनला दरमहा लाखो रुपयांची निश्चित अशी कमाई होत आहे.

हृतिकने फक्त मुंबईतच नाही तर पुण्यातही ऑफिस भाडेपट्टीवर देण्याचा व्यवसाय सुरू केला आहे. या नव्या व्यवसायामुळे हृतिक दरमहा मोठी कमाई करत आहे.