मुंबई : रामायण’ ट्रेलरची सुरुवात रावणाच्या प्रवेशापासून होते. रावण प्रवेश करतो तेव्हा त्याला कोणी ओळखत नाही. ''मी तुमचा नवीन राजा'', असं म्हणत प्रवेशद्वार तोडून रावण आत येतो. एकूणच रावणाची दहशत, त्याची ताकद अनुभवायला मिळते. पुढे मर्यादापुरुषोत्तम श्रीराम दिसतात. डोळ्यांवर पट्टी बांधून घोडेस्वारी करत श्रीराम आकाशातून कोसळणाऱ्या घंटेचा अचूक वेध घेतात. त्यानंतर कैकेयी श्रीरामांना वनवासात जायला सांगते तो प्रसंग आपल्याला भावुक करतो. सीतेची आणि लक्ष्मणाची श्रीरामांना मिळालेली खंबीर साथ दिसते. अयोध्या सोडताना श्रीरामांच्या डोळ्यांत पाणी येतं.येत्या दिवाळीमध्ये हा सिनेमा रिलीज होणार असून आज समोर आलेल्या ट्रेलरने प्रेक्षकांची उत्सुकता शिगेला पोहोचवली. (Ramayan Movie)
या वर्षाच्या दिवाळीत पहिला भाग आणि २०२७ च्या दिवाळीत दुसरा भाग प्रेक्षकांच्या भेटीस येणार आहे. तब्बल ४ मिनिटे ९ सेकंदांच्या या ट्रेलरमध्ये विविध पौरणिक पात्रांची झलक पाहायला मिळणार आहे. मात्र, सिनेप्रेमींचे लक्ष वेधून घेतले आहे ते एका खास सीनने.
रणबीर कपूर या सिनेमात दुहेरी भूमिकेत दिसणार आहे. तो यामध्ये'प्रभू श्रीराम' आणि 'प्रभू परशुराम' अशा दोन भूमिका साकारणार आहे. या दोन्ही पात्रांचं व्यक्तिमत्त्व पूर्णपणे वेगळं आहे. आता ट्रेलरमध्ये रणबीरचा परशुरामाच्या लूकची पहिली झलक पाहायला मिळते आहे. त्यामुळे चाहत्यांमध्ये उत्सुकतेचं वातावरण आहे. (Ranbir Kapoor)
ट्रेलरमधील एका सीनवर बारकाईने नजर टाकल्यास, लक्षात येते की सीता स्वयंवरानंतर अयोध्याकडे जाताना प्रभू श्रीराम आणि भगवान परशुराम यांची भेट होते.
रामायण सिनेमाचा ट्रेलर थेट पहाटे ब्रह्म मुहूर्तावर रिलीज करण्यात आला होता. प्रदर्शित होताच अवघ्या ६ तासांत यूट्यूबवर या ट्रेलरने ५० लाखांहून अधिक व्ह्यूजचा टप्पा ओलांडून नवा विक्रम रचला आहे.रणबीर कपूर, साई पल्लवी, यश आणि सनी देओल अशी तगडी स्टारकास्ट असलेल्या या चित्रपटाला यातील संगीताने जागतिक दर्जा देण्याचे काम केले आहे. (Ramayan Trailer)