मुंबई : पर्यावरणशास्त्रज्ञ सोनम वांगचुक यांच्या आंदोलनाला (Protest) पाठिंबा देण्यासाठी उबाठा गटाच्या वतीने मुंबईतील (Mumbai) दादर परिसरात रविवारी करण्यात आलेल्या आंदोलनाप्रकरणी पोलीस प्रशासनाने मोठी कारवाई केली आहे. शिवाजी पार्क पोलीस ठाण्यात या आंदोलनाविरोधात तीन स्वतंत्र गुन्हे दाखल करण्यात आले आहेत. विनापरवानगी आंदोलनाचे आयोजन करणे, बेकायदेशीरपणे गर्दी जमवणे आणि दादर परिसरामध्ये रस्ता अडवून मोठी वाहतूक कोंडी निर्माण केल्याचा ठपका उबाठा गटाच्या आयोजकांवर ठेवण्यात आला आहे.
सभागृहातील कामकाज पद्धतीवर प्रश्नचिन्ह मुंबई : मुंबई महापालिकेचे (BMC) सभागृहाच्या कामकाज हे १८८८ च्या अधिनियमातील तरतुदीनुसार आणि प्रथा आणि ...
उबाठा गटाने रविवारी दादरच्या (Dadar) शिवाजी पार्क परिसरात या आंदोलनाचे आयोजन केले होते. मात्र, या आंदोलनासाठी पोलिसांची कोणतीही अधिकृत परवानगी घेण्यात आली नव्हती. विनापरवानगी आंदोलनाचे आयोजन केल्याप्रकरणी आयोजकांवर पहिला गुन्हा नोंदवण्यात आला आहे. तसेच, आंदोलनाला पोलिसांची कोणतीही परवानगी नसतानाही पक्षाच्या वतीने कार्यकर्ते आणि नागरिकांना मोठ्या संख्येने घटनास्थळी जमण्याचे आवाहन करण्यात आले होते. बेकायदेशीरपणे जमाव जमवून नियमांचे उल्लंघन केल्याप्रकरणी दुसरा गुन्हा दाखल करण्यात आला आहे.
मुख्य आंदोलन संपल्यानंतरही दादर परिसरात ठिकठिकाणी कार्यकर्त्यांनी आंदोलन सुरूच ठेवले होते. यामुळे दादरसारख्या अत्यंत गजबजलेल्या भागात मोठ्या प्रमाणावर वाहतूक कोंडी निर्माण झाली आणि रस्ते अडवले गेल्याने सर्वसामान्य नागरिकांना नाहक त्रासाला सामोरे जावे लागले. रस्ता अडवून नागरिकांना वेठीस धरल्याप्रकरणी तिसरा गुन्हा दाखल करण्यात आला आहे. शिवाजी पार्क पोलिसांनी या तिन्ही गुन्ह्यांमध्ये अद्याप कोणालाही अटक केलेली नाही.
