Ahilyanagar : श्रीरामपूरमध्ये स्थानिक गुन्हे शाखेची सलग दुसऱ्या दिवशी मोठी कारवाई; एमडी तस्कर जेरबंद, अडीच लाखांचा मुद्देमाल जप्त

अहिल्यानगर (श्रीरामपूर) : श्रीरामपूर शहरात अंमली पदार्थांविरोधात स्थानिक गुन्हे शाखेने सलग दुसऱ्या दिवशी मोठी कारवाई करत एमडी (मेफेड्रोन) या अंमली पदार्थाची विक्री करण्यासाठी आलेल्या एका संशयित तस्कराला अटक केली आहे. या कारवाईत सुमारे २ लाख ५२ हजार ८०० रुपयांचा मुद्देमाल जप्त करण्यात आला असून, एका फरार आरोपीचाही शोध सुरू आहे. या धडक कारवाईमुळे श्रीरामपूर शहरातील अंमली पदार्थांच्या अवैध व्यवहारांवर पोलिसांनी आणखी एक मोठा आघात केला आहे.

नेमकं काय घडलं ?

पोलीस अधीक्षक मुम्मका सुदर्शन यांनी जिल्ह्यात अंमली पदार्थांची विक्री व तस्करी करणाऱ्यांविरोधात कठोर कारवाई करण्याचे आदेश दिले आहेत. त्यानुसार स्थानिक गुन्हे शाखेचे पोलीस निरीक्षक संतोष मुटकुळे यांच्या मार्गदर्शनाखाली अंमली पदार्थविरोधी टास्क फोर्सने श्रीरामपूर शहर परिसरात विशेष मोहीम राबविली होती. या मोहिमेदरम्यान पथकाला गुप्त बातमीदारामार्फत माहिती मिळाली की, सोहेल जुबेर शेख (वय २७, रा. मिल्लतनगर, वार्ड क्र. २, श्रीरामपूर) हा एमडी अंमली पदार्थ विक्रीसाठी श्रीरामपूर-संगमनेर मार्गावरील नांदूर शिवारातील अस्तगाव फाटा परिसरात येणार आहे.

माहितीची खात्री करून स्थानिक गुन्हे शाखेने श्रीरामपूर शहर पोलीस ठाण्याशी (Shrirampur City Police Station) समन्वय साधला. पोलीस निरीक्षक विशाल खैरे यांच्या आदेशानुसार संयुक्त पथकाने संबंधित ठिकाणी सापळा रचला. दरम्यान, पांढऱ्या रंगाच्या मोपेडवर संशयास्पदरीत्या थांबलेल्या एका तरुणाला ताब्यात घेऊन त्याची झडती घेण्यात आली. त्याच्याकडे असलेल्या प्लास्टिक पाऊचमध्ये उग्र वास असलेला पदार्थ आढळून आला. चौकशीदरम्यान संबंधित पदार्थ एमडी (मेफेड्रोन) असल्याची कबुली आरोपीने दिली. पोलिसांनी आरोपीकडून सुमारे ९६ हजार ६०० रुपयांचा ४.८३ ग्रॅम एमडी अंमली पदार्थ, ६ हजार २०० रुपये रोख, ५० हजार रुपयांचा मोबाईल आणि १ लाख रुपयांची मोपेड असा एकूण २ लाख ५२ हजार ८०० रुपयांचा मुद्देमाल जप्त केला.

चौकशीदरम्यान आरोपीने हा एमडी अंमली पदार्थ असीफ मुनीर शेख (रा. बेलापूर, ता. श्रीरामपूर) याच्याकडून आणल्याची माहिती पोलिसांना दिली. या प्रकरणात असीफ शेख हा फरार असून त्याचा शोध सुरू करण्यात आला आहे. या प्रकरणी स्थानिक गुन्हे शाखेचे पोलीस कर्मचारी रमिजराजा रफीक आतार यांच्या फिर्यादीवरून श्रीरामपूर शहर पोलीस ठाण्यात (Shrirampur City Police Station) गुन्हा दाखल करण्यात आला आहे. आरोपीविरुद्ध गुंगीकारक औषधे आणि मनोव्यापारावर परिणाम करणारे पदार्थ (एनडीपीएस) अधिनियम, १९८५ अंतर्गत कलम ८(क) व २१(ब) अन्वये गुन्हा दाखल करण्यात आला असून पुढील तपास श्रीरामपूर शहर पोलीस करीत आहेत.

दरम्यान, अंमली पदार्थांच्या तस्करीविरोधात सलग दुसऱ्या दिवशी करण्यात आलेल्या या धडक कारवाईमुळे श्रीरामपूर शहरात अवैध अंमली पदार्थांच्या व्यवहारांवर पोलिसांनी प्रभावी अंकुश ठेवण्याचा निर्धार स्पष्ट केला असून अशा कारवाया पुढेही अधिक तीव्रतेने सुरू राहणार असल्याचे पोलिसांकडून सांगण्यात आले आहे.