२९ जुलै रोजी पुण्यात पार पडणार सोहळा; मैत्रीण कायनात धार हिच्यासोबत अडकणार विवाहबंधनात
मुंबई : महाराष्ट्राचे दिवंगत नेते अजित पवार(Ajit Pawar) आणि उपमुख्यमंत्री सुनेत्रा पवार(Sunetra Pawar) यांचे सुपुत्र, खासदार पार्थ पवार(Parth Pawar) लवकरच विवाहबंधनात अडकणार आहेत. येत्या २९ जुलै रोजी पुण्यात एका फार्महाऊसवर पार्थ यांचा साखरपुडा समारंभ अत्यंत थाटामाटात पार पडणार असल्याची माहिती समोर आली आहे. पार्थ हे त्यांची दीर्घकाळाची मैत्रीण आणि व्यावसायिक कायनात धार हिच्यासोबत लग्नाच्या बोहल्यावर चढणार असून, या साखरपुड्याच्या निमित्ताने पवार कुटुंबात लवकरच सनईचौघडे वाजणार आहेत.
पार्थ पवार यांच्या आत्या सुप्रिया सुळे यांची लेक रेवती सुळेचा विवाह सोहळा नुकताच पार पडला. या शाही विवाह सोहळ्यात पार्थ आणि सुनेत्रा पवार यांच्यासोबत पारंपरिक पोशाखात उपस्थित असलेली तरुणी सर्वांचेच लक्ष वेधून घेत होती. ती तरुणी म्हणजेच कायनात धार असून, ती लवकरच पवार कुटुंबाची सूनबाई होणार असल्याचे स्पष्ट झाले आहे. कायनात ही एक नामांकित मॉडेल आणि यशस्वी व्यावसायिक आहे. ती मूळची काश्मीरची रहिवासी असून तिचे शालेय व उच्च शिक्षण दिल्लीत पूर्ण झाले आहे. सध्या व्यावसायिक कारणांमुळे ती दिल्ली आणि मुंबई या दोन्ही शहरांमध्ये वास्तव्यास असते. अजित पवार यांच्या निधनानंतर पवार कुटुंबीयांचे सांत्वन करण्यासाठी कायनात बारामती आणि मुंबईत झालेल्या शोकसभेलाही आवर्जून उपस्थित राहिली होती. काही महिन्यांपूर्वी पार्थ आणि कायनात हे मध्य प्रदेशातील प्रसिद्ध महाकाल मंदिरात एकत्र दर्शन घेताना दिसले होते आणि तेव्हापासूनच या दोघांच्या प्रेमसंबंधांच्या चर्चांना उधाण आले होते.
व्हिएतनाम : व्हिएतनाममधील 'फू क्वोक' बेटाजवळ भारतीय पर्यटकांना घेऊन जाणारी बोट उलटल्याची हृदयद्रावक घटना समोर आल्यानंतर संपूर्ण देशावर शोककळा पसरली ...
पार्थ पवार हे राष्ट्रवादी काँग्रेस पक्षाचे प्रमुख युवा नेते असून, सध्या ते राज्यसभेत खासदारकी भूषवत आहेत. यापूर्वी २०१९ च्या लोकसभा निवडणुकीत त्यांनी मावळ मतदारसंघातून निवडणूक लढवून पहिल्यांदा आपले राजकीय नशीब आजमावले होते; मात्र त्या निवडणुकीत त्यांना यश मिळू शकले नव्हते. आता खासदारकीची नवीन जबाबदारी सांभाळत असतानाच पार्थ पवार आपल्या आयुष्याची देखील नवी सुरुवात करणार आहेत.