Amit Satam : विधान भवनाच्या पायऱ्यांवरील कॅमेऱ्यांना आवरा; अमित साटम यांची मागणी

- मृत्यूवर हसलो नाही, दिशाभूल करणाऱ्या व्हिडिओची चौकशी करा

मुंबई : विधानभवनाच्या परिसरात माध्यमांशी संवाद साधत असताना, अत्यंत चुकीचा आणि दिशाभूल करणारा व्हिडिओ वृत्तवाहिन्यांवरून प्रसारित करण्यात आल्याचा आरोप करत भाजप आमदार आणि मुंबई अध्यक्ष अमित साटम (Amit Satam) यांनी या प्रकरणाची उच्चस्तरीय चौकशी करून संबंधितांवर कठोर कारवाई करण्याची मागणी मंगळवारी विधानसभेत केली. "मी कोणत्याही मृत्यूच्या घटनेवर हसलो नाही. माध्यमांनी संभाषणातील काही सेकंदांचा भाग एडिट करून दाखवल्यामुळे समाजात चुकीचा संदेश गेला आहे," असे सांगत साटम यांनी विधानभवनाच्या पायऱ्यांसमोर चित्रिकरण करणाऱ्या माध्यमांच्या कॅमेऱ्यांवर नियंत्रण आणण्याची आग्रही मागणी सभागृहात केली.

सभागृहात या विषयाकडे लक्ष वेधताना अमित साटम (Amit Satam) म्हणाले की, अधिवेशन कालावधीत विधानभवनाच्या पायऱ्यांसमोर माध्यमांचे कॅमेरे २४ तास लावलेले असतात. मागील आठवड्यात आपण माध्यमांशी बोलत उभे असताना तेथून ज्येष्ठ आमदार जयंत पाटील जात होते. त्यावेळी आमच्या दोघांमध्ये एका पूर्णपणे वेगळ्याच विषयावर हलक्या-फुलक्या स्वरूपात चर्चा झाली आणि त्यानंतर जयंत पाटील तेथून निघून गेले. मात्र, त्यानंतर एका वाहिनीने आमच्यातील संभाषणाचा मूळ संदर्भ बाजूला ठेवून केवळ काही सेकंदांचा भाग दाखवला. यामुळे आपण एखाद्याच्या मृत्यूवर हसत असल्याचा अत्यंत चुकीचा आणि क्लेशदायक आभास निर्माण करण्यात आला. मी मृत्यूवर हसलो नाही, हे स्वतः जयंत पाटील यांनाही चांगल्या प्रकारे माहिती आहे. आमच्यातील संभाषण संपूर्ण वेगळ्या विषयावर होते, मात्र त्याचा सोयीस्कर तुकडा दाखवून समाजात माझी नाहक बदनामी करण्यात आली, असा संताप त्यांनी व्यक्त केला.

उद्या २८८ सदस्यांपैकी कोणासोबतही असे घडू शकते!

या घटनेकडे वैयक्तिक प्रकरण म्हणून न पाहता लोकशाही संस्थांच्या आणि विधिमंडळाच्या प्रतिष्ठेच्या दृष्टीने गांभीर्याने पाहण्याची गरज असल्याचे साटम यांनी नमूद केले. आज ही दुर्दैवी घटना माझ्यासोबत घडली आहे; मात्र अशाच प्रकारे लोकप्रतिनिधींच्या वक्तव्यांचे चुकीचे एडिटिंग होत राहिले, तर उद्या विधानसभेतील २८८ सदस्यांपैकी कोणत्याही सदस्यासोबत असाच प्रकार घडू शकतो, अशी भीती त्यांनी व्यक्त केली. अशा दिशाभूल करणाऱ्या व्हिडिओंवर तातडीने नियंत्रण ठेवण्यासाठी आणि माध्यमांची जबाबदारी निश्चित करण्यासाठी सभागृहाने या प्रकरणाची गंभीर दखल घेऊन सखोल चौकशी करावी, अशी मागणी अमित साटम (Amit Satam) यांनी शेवटी केली.