Mumbai rain news : मुंबईत मुसळधार पावसाचा इशारा; खासगी कार्यालयांना वर्क फ्रॉम होमचा सल्ला, सरकारी कार्यालये अर्धा दिवस सुरू राहणार

मुंबई : मुंबईत (Mumbai) सुरू असलेल्या मुसळधार पावसाच्या पार्श्वभूमीवर महाराष्ट्र राज्य आपत्ती व्यवस्थापन प्राधिकरणाने (SDMA) नागरिकांच्या सुरक्षिततेसाठी महत्त्वाच्या सूचना जारी केल्या आहेत. पावसामुळे शहरातील वाहतूक आणि दैनंदिन कामकाजावर परिणाम होण्याची शक्यता लक्षात घेऊन खासगी कंपन्यांनी शक्य असेल तेथे कर्मचाऱ्यांना वर्क फ्रॉम होमची (Work From Home) सुविधा उपलब्ध करून द्यावी, असे आवाहन करण्यात आले आहे.



याचबरोबर अत्यावश्यक सेवा वगळता इतर सरकारी कार्यालयांचे कामकाज अर्धा दिवस ठेवण्याचा निर्णय घेण्यात आला आहे. हवामानाचा अंदाज आणि पावसाची तीव्रता लक्षात घेऊन हा निर्णय घेण्यात आल्याची माहिती प्रशासनाने दिली. (SDMA advisory Mumbai)



राज्य आपत्ती व्यवस्थापन प्राधिकरणाने नागरिकांना विनाकारण घराबाहेर पडणे टाळण्याचे आवाहन केले आहे. अत्यावश्यक काम असल्याशिवाय प्रवास करू नये, तसेच हवामान आणि वाहतुकीसंदर्भातील अधिकृत सूचनांवरच विश्वास ठेवावा, असेही सांगण्यात आले आहे. (Heavy Rain Alert)

गेल्या काही दिवसांपासून मुंबईत मुसळधार पाऊस सुरू असून अनेक ठिकाणी पाणी साचणे, झाडे कोसळणे आणि वाहतुकीचा वेग मंदावल्याच्या घटना घडल्या आहेत. काही भागांमध्ये जनजीवनही विस्कळीत झाले आहे. त्यामुळे प्रशासन परिस्थितीवर सातत्याने लक्ष ठेवून असून आवश्यकतेनुसार पुढील सूचना जारी केल्या जाणार आहेत.