Tree Fall in Santacruz : सांताक्रुझमध्ये झाड पडून ८ जण जखमी

मुंबई (विशेष प्रतिनिधी) : चेंबूर येथे शाळेच्या बसवर झाड पडून एका शाळकरी मुलाचा मृत्यू तसेच चार विद्यार्थी जखमी झाल्यानंतर गुरुवारी सांताक्रुझ पश्चिम येथे रहेजा कॉलेज शेजारी एका खासगी इमारतीच्या आवारातील झाड पडून ८ जण जखमी झाले आहे. विशेष म्हणजे हे झाडांची छाटणी करण्यासाठी आलेले कर्मचारी पाहणी करत असताना बाजूचे झाड कोसळून हे सर्व त्यात जखमी झाले.

मुंबईत दिवसात शहरात १३ झाडे पडण्याच्या घटना घडल्या. त्याबरोबरच पूर्व उपनगरात २२ व पश्चिम उपनगरात ५६ अशा एकूण ९१ ठिकाणी झाडे/फांदया पडण्याच्या तक्रारी प्राप्त झाल्या होत्या. यामध्ये सांताक्रुझ पश्चिम येथील झाड दुघर्टनेचा समावेश आहे. गुरुवारी दुपारी २ वाजता सुमारास रिलीफ रोड, रहेजा कॉलेज शेजारी, सांताक्रूझ (प) येथे खाजगी इमारतीच्या आवारात पडलेल्या झाडाची पहाणी करण्याकरिता तेथील कर्मचारी गेले असता बाजूचे झाड त्यांच्यावर कोसळले. या घटनेत ८ लोक जखमी झाले. या ८ लोकांना उपचारार्थ नानावटी रुग्णालयात दाखल करण्यात आले. यासर्वांची प्रकृती स्थिर असल्याचे डॉक्टरांनी सांगितले. यामध्ये नूर आलम (पुरुष / २६ वर्षे), राजेश कुडाळकर - (पुरुष / ५१ वर्षे), विनय कदम (पुरुष / ३८ वर्षे), सुलेमान शेख - (पुरुष / २८ वर्षे), विनोद भट (पुरुष / ४६ वर्षे), देवर्षी सिंह - (पुरुष / २८ वर्षे), जगदीश निकम - (पुरुष / २८ वर्षे)] निलाद तुळे (पुरुष / ६७ वर्षे,) आहेत.

जून महिन्याच्या सुरुवातील खार लिंकिंग रोडवरील एसआरए प्रकल्पांतर्गत जागेतील एक झाड कोसळून दोन मुली जखमी झाल्या होत्या. त्यातील एका मुलींचा मृत्यू झाला आणि दुसरीवर अद्यापही उपचार सुरु आहे. त्यानंतर बुधवारी चेंबूर येथील युनिव्हर्सल शाळेच्या बसवर पिंपळाचे झाड पडून एका ११ वर्षीय मुलाचा मृत्यू झाला आहे, तर चार विद्यार्थी जखमी झाले आहेत. त्यामुळे झाड पडण्याच्या घटनांमध्ये वाढ होवून जिवितांचे नुकसान होत असल्याने भितीचे वातावरण पसरले आहे.