Plane Crashes : बीजिंगमध्ये हाहाकार! १७०० फुटी 'चायना झुन' टॉवरमध्ये घुसलं विमान

बीजिंगच्या सर्वात उंच इमारतीला विमानाची जोरदार धडक

चीन: चीनची (China) राजधानी बीजिंगमध्ये (Beijing) शुक्रवारी एक धक्कादायक घटना घडली. शहरातील सर्वात उंच इमारतींपैकी एक असलेल्या CITIC टॉवरला, ज्याला 'चायना झुन' म्हणूनही ओळखले जाते, एका लहान विमानाची धडक बसल्याची माहिती समोर आली आहे. घटनेनंतर परिसरात मोठी खळबळ उडाली असून आपत्कालीन यंत्रणा तातडीने घटनास्थळी दाखल झाली.

प्रत्यक्षदर्शींच्या माहितीनुसार, विमान इमारतीच्या उंच मजल्यावरील भागावर आदळल्यानंतर त्याचे तुकडे खाली रस्त्यावर पडले. धडकेमुळे इमारतीच्या काही काचा फुटल्या असून तळभागाजवळ धूर दिसल्याचेही सांगितले जात आहे. सोशल मीडियावर या घटनेचे अनेक व्हिडिओ आणि छायाचित्रे व्हायरल झाली आहेत. मात्र, त्यांची स्वतंत्रपणे अधिकृत पडताळणी झालेली नाही.

घटनेनंतर सुरक्षा कारणास्तव संपूर्ण इमारत रिकामी करण्यात आली. परिसरातील रस्ते बंद करण्यात आले असून पोलीस, अग्निशमन दल आणि अन्य आपत्कालीन यंत्रणा घटनास्थळी तैनात करण्यात आल्या आहेत. अधिकाऱ्यांनी अद्याप मृत्यू किंवा जखमींबाबत कोणतीही अधिकृत माहिती जाहीर केलेली नाही.

प्राथमिक माहितीनुसार, अपघातग्रस्त विमान हे चीनमध्ये तयार करण्यात आलेले हलक्या प्रकारातील सनवर्ड SA 60L अरोरा (Sunward SA 60L Aurora) असल्याचा अंदाज व्यक्त केला जात आहे. मात्र, अपघाताचे नेमके कारण आणि विमानाने इमारतीला कशी धडक दिली, याबाबत तपास सुरू आहे.

CITIC टॉवर ही बीजिंगमधील महत्त्वाची व्यावसायिक इमारत असून तिची उंची सुमारे 528 मीटर आहे. ही चीनमधील सर्वात उंच इमारतींपैकी एक मानली जाते. या घटनेनंतर विमान वाहतूक सुरक्षेबाबत अनेक प्रश्न उपस्थित झाले असून अधिकृत तपास अहवालाची प्रतीक्षा आहे.