Nashik Crime : नाशिक जिल्ह्यातील मालेगाव येथे एक खळबळजनक घटना समोर आली आहे. अनैतिक संबंधातून गर्भवती राहिलेल्या १६ वर्षीय मुलीची बेकायदेशीर प्रसुती करून तिच्या बाळाला विक्री करण्याच्या उद्देशाने ठेवून घेतल्याने चौघा डॉक्टरांसह ११ जणांविरुद्ध गुन्हा दाखल करत ९ जणांना अटक करण्यात आली आहे.
नेमकं प्रकरण काय ?
मालेगाव शहरातील हिराई रूग्णालयात (Hirai Hospital) ३ जून रोजी संजय भागवत गवळी, नंदिनी गवळी, प्रवीण देशमुख यांनी अनैतिक संबंधातून गर्भवती (Pregnant) राहिलेल्या अल्पवयीन मुलीला प्रसूतीसाठी दाखल केले होते. ही मुलगी अल्पवयीन होती हे माहित असून देखील डॉ. डांगे व डॉ. किशोरी डांगे यांच्या सांगण्यावरून तिला रूग्णालयात दाखल करण्यात आले , एवढेच नाही तर नियुक्तीस असलेल्या डॉ. अनुजा शेवाळे, डॉ. प्रीती जाधव, कर्मचारी नवसिन रफिक शेख, सार्थक प्रवीण जगताप, मोहंमद फईम मोहंमद यांनी तिची सिझरियनद्वारे प्रसुती केली.
धक्कादायक म्हणजे प्रसुतीनंतर जन्मलेल्या बाळाची विक्री करण्याच्या हेतूने त्याची ओळख लपविण्याचा आरोपही फिर्यादीत करण्यात आला आहे. मालेगाव (Malegaon) येथील सामान्य रुग्णालयाचे वैद्यकिय आरोग्याधिकारी डॉ. जितेंद्र डोलारे यांना काही सामाजिक कार्यकर्त्यांनी ही माहिती दिली यावेळेस त्यांनी पोलिसात फिर्याद दिली. (Nashik Crime News )
पोलिसांनी सदर मुलीला गर्भवती करणाऱ्या अनोळखी तरूणासह संजय गवळी, प्रवीण देशमुख, नंदिनी गवळी, हिरा रूग्णालयाचे (Hospital) संचालक डॉ किशोर डांगे, डॉ. किशोरी डांगे रूग्णालयातील वैद्यकीय कर्मचारी डॉ. अनुजा शेवाळे, डॉ. प्रिती जाधव, रूग्णालय कर्मचारी नवसिन शेख, मोहंमद फईम सार्थक जगताप यांच्याविरूध पोक्सो (POCSO) व अन्य कायद्यान्वये गुन्ह दाखल केला आहे. यातील दोघे फरार असून अटक करण्यात आलेल्यांना १२ जूनपर्यंत पोलीस कोठडी (Police Custody) देण्यात आली आहे.
Ahilyangar Crime News : अहिल्यानगर जिल्ह्यातील कोपरगाव (Kopargaon) शहरात मध्यरात्री गुंडांचा हैदोस पहायला मिळाला आहे. मध्यरात्रीच्या सुमारास गुंडगिरी आणि दहशतीच्या एका ...
डॉ.किशोर डांगे यांच्याविरोधात अनेक तक्रारी प्राप्त
हिराई हॉस्पीटल हे डॉक्टर किशोर डांगे यांचे असून या बाबतीत आम्हाला तक्रारी प्राप्त झाल्या होत्या, असे आरोग्य प्रशासनाने सांगितले आहे. हिराई हॉस्पीटलचे मालक डॉ.किशोर डांगे यांच्याविरोधात अनेक तक्रारी प्राप्त झाल्या होत्या. गर्भलिंग निदान, गैर मार्गाने अबॉर्शन करणे अशा तक्रारी प्राप्त झाल्यानंतरच कारवाई करण्यात आली आहे, असे आरोग्य प्रशासनाने सांगितले आहे. तसेच आम्हाला प्रत्यक्ष अवैध प्रसूती व बालकाची विक्री करण्याचे रॅकेट असल्याचा संशय आहे. त्यानुसार पोलिसांची संपर्क साधून त्या संदर्भात गुन्हा दाखल करण्यात आल्याचेही प्रशासनाने सांगितले आहे.
चौकशी समिती स्थापन
दरम्यान, या प्रकरणाचा तपास करण्यासाठी चौकशी समिती स्थापन करण्यात आली आहे. या प्रकरणात निष्पक्ष चौकशी करून पुढील कारवाई केली जाईल. बोगस डॉक्टर संदर्भात सबळ पुरावे मिळणे आवश्यक आहे. बोगस डॉक्टर संख्या कमी करणे, अवैध गर्भपात संदर्भात कठोर कारवाई केली जाईल असे, मालेगावचे आरोग्य अधिकारी जितेंद्र डोलरे यांनी सांगितले आहे.