मुंबई : ठाणे जिल्ह्याच्या राजकारणात आणि विधान परिषदेत आपल्या अजातशत्रू व्यक्तिमत्त्वाने दीर्घकाळ ठसा उमटवणारे दिवंगत नेते वसंत डावखरे यांचे चिरंजीव प्रमोद डावखरे यांनी बुधवारी राष्ट्रवादी काँग्रेसमध्ये प्रवेश केला. राष्ट्रवादीच्या प्रदेश कार्यालयात आयोजित विशेष कार्यक्रमात, राज्याचे अन्न व नागरी पुरवठा मंत्री छगन भुजबळ आणि ज्येष्ठ नेते दिलीप वळसे-पाटील यांच्या प्रमुख उपस्थितीत हा पक्षप्रवेश सोहळा पार पडला.
यावेळी प्रमोद डावखरे यांचे पक्षात स्वागत करताना मंत्री छगन भुजबळ म्हणाले, "दिवंगत वसंत डावखरे यांनी राष्ट्रवादी काँग्रेस पक्ष वाढवण्यासाठी रक्ताचे पाणी केले होते. अनेक वर्षे त्यांनी विधान परिषदेचे सभापतीपद भूषवले. राजकारणात 'अजातशत्रू' म्हणून ओळखल्या जाणाऱ्या वसंतरावांचे चिरंजीव प्रमोद आज राष्ट्रवादीत आले, ही आनंदाची बाब आहे. प्रमोद डावखरे यांना पक्षात मानाचे स्थान आणि चांगली वागणूक मिळेल. संपूर्ण पक्ष त्यांच्या पाठीशी भक्कमपणे उभा राहील, असा शब्द मी या निमित्ताने देतो."
पक्षप्रवेशानंतर माध्यमांशी बोलताना प्रमोद डावखरे यांनी सांगितले, "माझे वडील दिवंगत वसंत डावखरे यांच्या काळात ठाणे आणि आसपासच्या परिसरात राष्ट्रवादी काँग्रेसचे जसे एकहाती वर्चस्व होते, तेच वर्चस्व आणि ताकद पुन्हा निर्माण करण्याचा माझा निर्धार आहे. खासदार पार्थ पवार यांच्या नेतृत्वाखाली आम्ही संघटन अधिक मजबूत करू," असा विश्वास त्यांनी व्यक्त केला. ज्येष्ठ नेते दिलीप वळसे-पाटील यांनीही प्रमोद यांच्या प्रवेशाने ठाणे जिल्ह्यात पक्ष संघटना निश्चितच बळकट होईल, असे सांगितले.v