Kerala Congress Headquarters : पुरुष आमदाराकडून महिला आमदाराला बळजबरीने मिठी मारण्याचा प्रयत्न, सोशल मीडियावर संताप

- केरळ काँग्रेस मुख्यालयातील धक्कादायक घटना

केरळ : केरळ काँग्रेस मुख्यालयाच्या (Kerala Pradesh Congress Committee) तिरुवनंतपुरम येथील मुख्यालयातील एक व्हिडीओ सध्या सोशल मीडियावर प्रचंड व्हायरल होत असून त्यावरून मोठा वाद निर्माण झाला आहे. काँग्रेस नेते चेरियन फिलिप (MLA ) यांनी नुकत्याच निवडून आलेल्या कोल्लमच्या आमदार बिंदू कृष्ण (Bindu Krishna) यांना त्यांच्या मनाविरुद्ध मिठी मारण्याचा प्रयत्न केल्याचा आरोप होत आहे.

व्हायरल व्हिडीओमध्ये बिंदू कृष्णा या विधिमंडळ पक्षाच्या बैठकीसाठी कार्यक्रमस्थळी पोहोचताना दिसत आहेत. त्या सुरुवातीला प्रसारमाध्यमांच्या प्रतिनिधींना अभिवादन करतात आणि त्यानंतर चेरियन फिलिप यांच्या दिशेने जातात. व्हिडीओनुसार, बिंदू कृष्णा यांनी सुरुवातीला हस्तांदोलनासाठी हात पुढे केल्याचे दिसते. मात्र, त्यावेळी चेरियन फिलिप यांनी पुढे होत त्यांना मिठी मारण्याचा प्रयत्न केल्याचे दृश्य समोर आले आहे.

विशेष म्हणजे, बिंदू कृष्णा या मागे सरकल्यानंतरही चेरियन फिलिप यांनी पुन्हा एकदा मिठी मारण्याचा प्रयत्न केला. हा प्रकार कॅमेऱ्यात कैद झाला आहे. चेरियन फिलिप यांच्या या कृतीनंतर बिंदू कृष्णा हात जोडून पुढे निघून जात परिस्थिती हाताळण्याचा प्रयत्न केल्याचे व्हिडीओमधून दिसत आहे. हा व्हिडीओ व्हायरल होताच सोशल मीडियावर तीव्र प्रतिक्रिया उमटू लागल्या आहेत.

अनेकांनी सार्वजनिक आणि व्यावसायिक कार्यक्रमांमध्ये वैयक्तिक मर्यादांचा आदर राखणे आवश्यक असल्याचे म्हटले आहे. “एखादी व्यक्ती अस्वस्थ असल्याचे स्पष्ट दिसत असताना तिच्या वैयक्तिक स्पेसचा सन्मान राखला गेला पाहिजे,” अशा प्रतिक्रिया नेटिझन्सकडून व्यक्त केल्या जात आहेत. काहींनी हा प्रकार महिलांविषयीच्या संवेदनशीलतेच्या मुद्द्याशी जोडत राजकीय क्षेत्रातील वर्तनसंहितेवरही प्रश्न उपस्थित केले आहेत.

या घटनेनंतर राजकीय वर्तुळातही चर्चा रंगू लागल्या असून सार्वजनिक कार्यक्रमांमध्ये नेत्यांच्या वर्तनाबाबत नव्याने प्रश्न उपस्थित होत आहेत. महिला नेत्यांबाबत आदरयुक्त आणि संयमी वर्तनाची गरज असल्याची भावना अनेकांनी व्यक्त केली आहे.

दरम्यान, या प्रकरणावर ना चेरियन फिलिप यांनी, आणि नाही बिंदू कृष्णा यांनी अधिकृत आणि सविस्तर प्रतिक्रिया दिली. मात्र, सोशल मीडियावर हा व्हिडीओ वेगाने व्हायरल होत असून ‘संमती’, ‘वैयक्तिक मर्यादा’ आणि ‘सार्वजनिक शिष्टाचार’ या मुद्द्यांवर पुन्हा एकदा मोठी चर्चा सुरू झाली आहे.