नाशिक : हिमालयातील आव्हानात्मक परिस्थितीत पार पडणाऱ्या हिमालयन एक्स्ट्री सोलो पॉइंट फाईव्ह ट्रायथलॉनमध्ये डॉ. देविका पाटील यांनी ऐतिहासिक कामगिरी नोंदवली. त्या ही शर्यत पूर्ण करणाऱ्या पहिल्या भारतीय महिला आणि केवळ दुसऱ्या भारतीय ठरल्या. नेपाळमधील अन्नपूर्णा पर्वतरांगांच्या सान्निध्यात होणारी ही स्पर्धा जगातील सर्वात कठीण एक्स्ट्रीम ट्रायथलॉनपैकी एक मानली जाते.
डॉ. पाटील या नाशिकमधील स्वास्थ्य मेंटल हेल्थ क्लिनिकमध्ये मनोचिकित्सक म्हणून कार्यरत असून, व्यस्त दिनचर्येतून वेळ काढत त्यांनी या स्पर्धेची तयारी केली. चार महिन्यांच्या कठोर सरावातून त्यांनी हे यश मिळवले. या ट्रायथलॉनमध्ये १.९ किमी पोहणे, ९० किमी सायकलिंग (२,४०० मीटर चढ) आणि २१ किमी ट्रेल रन (१,७४० मीटर चढ) असे टप्पे सलग पूर्ण करावे लागतात. एकूण उंची सुमारे ४,१४० मीटर आहे.सरावासाठी त्यांनी अंबोली घाट आणि कसारा घाट येथे सायकलिंगसह पोहणे व ट्रेल रनिंगचा नियमित सराव केला.डॉ. पाटील यांचे पुढील लक्ष्य पूर्ण अंतराची हिमालयन एक्स्ट्री शर्यत पूर्ण करण्याचे आहे.
'ट्रायथलॉन' नेमके आहे तरी काय ?
ट्रायथलॉन (Triathlon) ही एक अत्यंत आव्हानात्मक सहनशीलता (endurance) मल्टिस्पोर्ट शर्यत आहे, ज्यामध्ये पोहणे, सायकलिंग आणि धावणे या तीन क्रीडा प्रकारांचा सलग समावेश होतो. या ट्रायथलॉनमध्ये १.९ किमी पोहणे, ९० किमी सायकलिंग (२,४०० मीटर चढ) आणि २१ किमी ट्रेल रन (१,७४० मीटर चढ) असे टप्पे सलग पूर्ण करावे लागतात. एकूण उंची सुमारे ४,१४० मीटर आहे.