नाशिक : नाशिकच्या पंचवटी (panchavti) परिसरात एका ३८ वर्षीय तरुणाने आत्महत्या केली आहे. आईसोबत झालेल्या आर्थिक वादाच्या रागातून ३८ वर्षीय ट्रॅव्हल्स व्यावसायिकाने घराच्या पाचव्या मजल्यावरून उडी मारून जीवन संपवल्याची धक्कादायक घटना घडलीय. देवेंद्र संजय थोरात (३८, रा. निर्माण उपवन, ढिकलेनगर, पंचवटी) असे मृताचे नाव आहे. (Nashik suicide news)
नेमकं काय घडलं ?
मंगळवारी रात्री साडेअकराच्या सुमारास देवेंद्र थोरात यांचे त्यांच्या आईसोबत पैशांच्या कारणावरून कडाक्याचे भांडण झाले. कौटुंबिक वाद इतका विकोपाला गेला की मध्यरात्री एकच्या सुमारास देवेंद्र यांनी नैराश्यातून थेट घराच्या पाचव्या मजल्यावरील गॅलरीतून खाली उडी मारली. या घटनेत देवेंद्र यांच्या डोक्याला आणि डाव्या हाताला गंभीर दुखापत झाली. घडलेली घटना लक्षात येताच मेहुणे गौरव जयवंत वायकुळ यांनी त्यांना उपचारासाठी आडगाव नाका येथील खासगी हॉस्पिटलमध्ये दाखल केले. (Nashik suicide news)
मात्र, हॉस्पिटलमधील डॉक्टरांनी तपासणीअंती पहाटे मृत घोषित केले. देवेंद्र यांच्या या टोकाच्या कृतीमुळे दोन लेकरं पोरकी झाली आहेत. घटनेची माहिती मिळताच पंचवटी पोलीस ठाण्याचे (Panchvati Police Station) उपनिरीक्षक पंकज सोनवणे, सहायक उपनिरीक्षक दत्तू शेळके यांनी घटनास्थळी व रुग्णालयात धाव घेत माहिती घेतली. पंचवटी पोलीस ठाण्यात आकस्मिक मृत्यूची नोंद करण्यात आली असून पोलीस तपास करत आहेत. मृत देवेंद्र थोरात यांच्या पश्चात आई आणि दोन मुले असा परिवार आहे.
