2 players made an obscene VIDEO of a female doctor : क्रिकेट विश्वाला कलंक लावणारी धक्कादायक घटना उघडकीस आली आहे. श्रीलंकेचे क्रिकेटपटू पुन्हा एकदा एका लाजिरवाण्या वादात सापडले आहे. हे ताजे प्रकरण अत्यंत गंभीर आणि धक्कादायक असून, देशाच्या 19 वर्षांखालील संघातील दोन क्रिकेटपटूंना महिला डॉक्टरांचे त्यांच्या स्वच्छतागृहांमध्ये गुपचूप चित्रीकरण केल्याप्रकरणी अटक करण्यात आली आहे.
स्थानिक माध्यमांच्या वृत्तानुसार, ही घटना राजधानी कोलंबोच्या नाराहेनपिता भागातील एका खासगी हॉटेलमध्ये घडली, जिथे अनेक महिला डॉक्टर एका व्यावसायिक परिषदेसाठी थांबल्या होत्या. असा आरोप आहे की, क्रिकेटपटूंनी स्वच्छतागृहातील लहान छिद्रांचा किंवा मोकळ्या जागांचा फायदा घेऊन, त्या महिला आंघोळ करत असताना आपल्या मोबाईल फोनने त्यांचे चित्रीकरण केले. या प्रकरणी गुन्हा दाखल करण्यात आला असून दोन्ही खेळाडूंवर कायदेशीर कारवाई करण्यात आली. मात्र कोर्टानं त्यांची जामिनावर सुटका केली आहे. (Sri Lankan cricketers)
मिळालेल्या माहितीनुसार, दोन्ही क्रिकेटर हे श्रीलंकेचे असून ते १९ वर्षांखालील टीममध्ये खेळतात. पोलिसांनी तत्परतेने कारवाई करत दोन्ही खेळाडूंना अटक केली. नाराहेनपिता पोलिसांच्या माहितीनुसार, प्राथमिक तपासात असेही उघड झाले आहे की, आरोपींनी हॉटेलच्या आवारात उपस्थित असलेल्या काही पुरुषांचेही व्हिडिओ रेकॉर्ड केले होते. हे व्हिडिओ ऑनलाइन अपलोड केले गेले होते की सोशल मीडिया प्लॅटफॉर्मवर शेअर केले गेले होते, हे निश्चित करण्याच्या दिशेने आता तपास केला जात आहे.
आरोपींना न्यायालयात हजर केलं असता त्यांना वैयक्तिक जातमुचलक्यावर (सुमारे १,५६४ अमेरिकन डॉलर्सच्या रकमेचा जामीन) जामीन देण्यात आला आहे. न्यायालयाने त्यांना २५ मे रोजी पुन्हा न्यायालयात हजर राहण्याचे आदेश दिले आहेत. पोलीस सध्या 'डिजिटल फॉरेन्सिक' तपासणीद्वारे मोबाईलमधील डेटाचे विश्लेषण करत आहेत. ही घटना केवळ एक फौजदारी गुन्हा नाही; तर श्रीलंकेच्या क्रिकेटच्या प्रतिमेवर लागलेला एक मोठा डाग म्हणून त्याकडे पाहिले जात आहे.
श्रीलंकन क्रिकेटपटू यापूर्वीही वादात
- 2022 च्या टी20 विश्वचषकादरम्यान, धनुष्का गुणतिलकाला ऑस्ट्रेलियामध्ये बलात्काराच्या आरोपाखाली अटक करण्यात आली होती, तथापि नंतर न्यायालयाने त्याला दिलासा दिला.
- माजी खेळाडू दुलीप समरवीरा यांच्यावर एका महिला खेळाडूशी गैरवर्तन केल्याबद्दल ऑस्ट्रेलियामध्ये २० वर्षांची बंदी घालण्यात आली होती.
- 2010 च्या झिम्बाब्वे दौऱ्यादरम्यान, तिलकरत्ने दिलशान यांच्यावरही लैंगिक छळाचा आरोप झाला होता, ज्यात इतर खेळाडूंची नावेही उघड झाली होती.