नाशिक - नाशिक व श्रीक्षेत्र त्र्यंबकेश्वरमध्ये कुंभमेळ्यानिमित्त विविध विकासकामे वेगात सुरू असताना, चक्क नाशिक विभागीय आयुक्त तथा सिंहस्थ कुंभमेळा २०२७ ( Simhastha Kumbh Mela 2027) प्राधिकरणाचे अध्यक्ष डॉ. प्रवीण गेडाम यांची बनावट डिजिटल स्वाक्षरी करून पस्तीस कोटी रुपयांच्या कामाची बोगस वर्कआॅर्डर काढण्यात आली आहे. या घटनेने प्रशासना बरोबरच सर्वत्र एकच खळबळ उडाली आहे. ( Nashik News )
याप्रकरणी आयुक्त गेडाम यांचे स्वीय सहायक विजय सोनवणे यांनी दिलेल्या फिर्यादीवरून नाशिकरोड पोलिसांत गुन्हा दाखल करण्यात आला आहे. फिर्यादीनुसार, नाशिक- त्र्यंबकेश्वर कुंभमेळ्यानिमित्त दोन्ही ठिकाणी गत काही दिवसांपासून विकासकामे सुरू आहेत. या अनुषंगाने त्र्यंबकेश्वर कुंभमेळ्यासाठी सीसीटीव्ही बसविणे, ते कार्यान्वित करणे व त्यांची देखभाल या संदर्भातील वर्कआॅर्डरवर थेट आयुक्त गेडाम यांची बनावट डिजिटल स्वाक्षरी करण्यात आल्याचे उघड झाले आहे. त्र्यंबकेश्वर कुंभमेळा प्राधिकरणाने काढलेली ही बोगस स्वाक्षरी असलेली वर्कआॅर्डर इनोव्हेटिव्ह इंटेलिजन्स एआय आॅटोमेशन सोल्युशन्स, ठाणे या एजन्सीच्या नावे काढली आहे.
फिर्यादीत म्हटले आहे की, २८ एप्रिल रोजी नीळकंठ शेळके नामक व्यक्ती नाशिकरोड( Nashikroad ) येथील विभागीय महसूल आयुक्तालयात आली होती. त्याने दोन संशयास्पद पत्रांच्या वैधतेसंदर्भात विचारणा केली होती. ही पत्रे त्यांना नांदेड येथील स्वाभिमानी शेतकरी संघटनेचे गजानन पाटील चव्हाण यांनी दिली असल्याचे त्यांनी स्पष्ट केले होते.
तपासणीदरम्यान कुंभमेळा प्राधिकरण शाखेचे सहायक संशोधन अधिकारी योगेश सोमवंशी यांना या पत्रातील मजकूर, त्या मधील अंतर व स्वाक्षरीबाबत शंका आली. त्यांनी संबंधित पत्रे आयुक्त गेडाम यांना दाखवली व त्यांना आलेली शंका सांगितली. त्यावर आयुक्तांनी पत्रांचे बारकाईने अवलोकन केले असता, तेंव्हा त्यांच्या डिजिटल स्वाक्षरीतील नावाच्या इंग्रजी अक्षरे " Praveen" आणि "Pravin" यांतील घोळ त्यांच्या लक्षात आला.
त्याचबरोबर बनावट डिजिटल स्वाक्षरी करून पस्तीस कोटी रुपये कामाची बोगस वर्कआॅर्डर काढून शासनाची फसवणूक केल्याचे समोर आले. याबाबत अज्ञाताविरोधात पोलिसांत गुन्हा दाखल करण्यात आला आहे. या प्रकाराने कुंभमेळा प्राधिकरणासह प्रशासकीय वर्तुळात आणि नाशिक जिल्ह्यात मोठीच खळबळ उडाली आहे.
