Ashok Kharat Case : धर्माच्या आड काळे कारनामे! ‘भोंदू’ अशोक खरात प्रकरणात नवे धक्कादायक खुलासे

मुंबई : धर्माच्या नावाखाली महिलांचे लैंगिक शोषण आणि कोट्यवधी रुपयांची फसवणूक केल्याचा आरोप असलेला अशोक खरात (Ashok Kharat) याच्या अडचणी दिवसेंदिवस वाढताना दिसत आहेत. आधी ऑफिसबॉयने उघड केलेल्या धक्कादायक माहितीच्या पार्श्वभूमीवर आता त्याच्या फार्महाऊसवर काम करणाऱ्या कुकनेही खरातच्या काळ्या कारनाम्यांचा पर्दाफाश केला आहे.

मिळालेल्या माहितीनुसार, एका चार्टर्ड अकाउंटंटने (CA) या कुकच्या माध्यमातून खरातच्या हालचालींवर गुप्तपणे लक्ष ठेवले होते. यामुळे फार्महाऊसवर घडणाऱ्या संशयास्पद घटनांची माहिती बाहेर आली. विशेष म्हणजे, या ठिकाणचे सीसीटीव्ही फुटेज विशेष तपास पथकाच्या (Special Investigation Team) हाती लागले असून, त्यातून धक्कादायक बाबी समोर आल्या आहेत.

या व्हिडिओमध्ये अशोक खरात महिलांसोबत आक्षेपार्ह अवस्थेत दिसत असल्याचे समोर आले आहे. त्यामुळे त्याच्याविरोधातील लैंगिक शोषणाचे आरोप अधिक बळकट झाले आहेत. तपास अधिक खोलात जात असून, या व्हिडिओमधून आणखी गंभीर पुरावे समोर येण्याची शक्यता व्यक्त केली जात आहे.

दरम्यान, महिला अत्याचाराच्या सहाव्या गुन्ह्यात अटक झालेल्या खरात याची तीन दिवसांची पोलीस कोठडी आज संपत आहे. त्यामुळे त्याला पुन्हा न्यायालयात हजर करण्यात येणार आहे. तपासादरम्यान रोज नवे खुलासे होत असल्याने आणि पुराव्यांची साखळी वाढत असल्याने, एसआयटीकडून पुन्हा पोलीस कोठडीची मागणी होण्याची शक्यता आहे.

तपास यंत्रणांच्या माहितीनुसार, चौकशीदरम्यान अशोक खरात सहकार्य करत नसल्याचे दिसून येत आहे. सुरुवातीला प्रश्न टाळणारा खरात आता “मला काही आठवत नाही” असे सांगत असल्याचे सूत्रांनी नमूद केले आहे. यापूर्वीही डोकेदुखी आणि प्रकृती अस्वस्थ असल्याचे कारण देत चौकशी टाळण्याचा प्रयत्न केल्याची माहिती आहे.

या प्रकरणात पुढे आणखी कोणते खुलासे होणार आणि न्यायालय आज काय निर्णय देणार, याकडे सर्वांचे लक्ष लागले आहे.