सिंधुदुर्ग : 'प्रत्येकाला मराठी आलीच पाहिजे, ही आमची भूमिका आहे. आमच्या परिवहन मंत्र्यांनी घेतलेल्या भूमिकेला मुख्यमंत्र्यांचेही समर्थन आहे. जो कोणी महाराष्ट्रात व्यवसाय करतो, त्याने मराठी शिकलीच पाहिजे. उत्तर भारतीय भाऊदेखील मराठी शिकतील. या मुद्द्यावरून हिंदूंमध्ये फूट पाडण्याचे काम कोणी करू नये. ज्यांना मराठी शिकायची आहे, त्यांना आम्ही प्रशिक्षण आणि पुस्तके देऊ. मात्र, मारण्याची भाषा कोणी करू नये. तसेच मराठीचा आग्रह धरताना हिंदूंमध्ये फूट पाडू नये'; असे मंत्री नितेश राणे म्हणाले. ते सिंधुदुर्ग येथे प्रसारमाध्यमांच्या प्रतिनिधींशी बोलत होते.
संजय निरुपम यांचा विषय राज्याचे उपमुख्यमंत्री एकनाथ शिंदे हे स्वतःच हाताळतील. ते यासाठी सक्षम आहेत, असे एका प्रश्नाच्या उत्तरावेळी मंत्री नितेश राणे म्हणाले.
निर्लज्ज म्हणजे काय हे ज्यांना माहिती आहे त्यांनाच सगळे निर्लज्ज वाटतात. आधी त्यांनी स्वतःकडेच बघावे; असे अन्य एका प्रश्नाच्या उत्तरावेळी मंत्री नितेश राणे म्हणाले. नाव न घेता नितेश राणेंनी संजय राऊतांवर टीका केली.
सिंधुदुर्गच्या नाक्यावर टोल सुरू झाला आहे. पण जिल्ह्यातील गाड्यांना म्हणजेच MH-07 क्रमांकाच्या वाहनांना टोल आकारला जाणार नाही, असे पालकमंत्री या नात्याने नितेश राणेंनी सांगितले. जिल्ह्याला शुक्रवारी वादळाचा तडाखा बसला. वादळाने झालेल्या हानीचा आढावा घेऊन पालकमंत्र्यांनी नियमानुसार आवश्यक ती मदत देण्याचे आश्वासन दिले.