नवी दिल्ली : संसदेचे विशेष अधिवेशन १६ ते १८ एप्रिल या कालावधीत होणार आहे. या अधिवेशनाकरिता भारतीय जनता पक्षाने खासदारांसाठी तीन ओळींचा व्हिप जारी केला आहे. विशेष अधिवेशनात कामकाजासाठी हजर राहा असे स्पष्ट निर्देश भाजपने पक्षाच्या सर्व खासदारांना दिले आहेत. विशेष अधिवेशनात महिला आरक्षण विधेयक सादर होण्याची शक्यता आहे. या पार्श्वभूमीवर भाजपकडून व्हिप जारी करण्यात आला आहे.
गुरुवार ते शनिवार, १६ ते १८ एप्रिल २०२६ या कालावधीसाठी लोकसभा आणि राज्यसभेतील सर्व भाजप सदस्यांना तीन ओळींचा व्हिप बजावण्यात आला आहे. व्हिपचे काटेकोर पालन करण्याचे निर्देश भाजपने सर्व खासदारांना दिले आहेत. हा व्हिप पंतप्रधान मोदींसह भाजपच्या लोकसभा आणि राज्यसभेतील सर्व सदस्यांना बंधनकारक आहे.
नारी शक्ती वंदन कायद्याने महिलांचे आरक्षण नवीन जनगणना आणि मतदारसंघ पुनर्रचनेशी जोडले होते. कोरोना संकटामुळे जनगणनेला विलंब झाल्याने २०११ च्या जनगणनेच्या आकडेवारीनुसार देशात महिला आरक्षण लागू करण्यासाठी विशेष अधिवेशनात विधेयक सादर होण्याची शक्यता आहे.