मुंबई : गोरेगाव पूर्व येथील संतोषनगर परिसरात रविवारी घडलेल्या हिंदू आणि मुस्लिम गटांतील हाणामारीच्या घटनेनंतर सोमवारी महापालिकेच्या पी पूर्व विभागाच्या वतीने हल्लेखोर लोकांच्या अनधिकृत बांधकामांवर बुलडोझर चढवून ती बांधकामे जमीनदोस्त करण्यात आली. यात पान पट्टीच्या दुकानांसह काही कच्च्या बांधकामांवर हातोडा चालवण्यात आला.
गोरेगाव पूर्व संतोषनगर परिसरात दोन वेगवेगळ्या समुदायातील तरुणांमध्ये शुल्लक कारणावरून बाचाबाची झाली. याचे रूपांतर काही वेळातच मोठ्या भांडणात झाले. दोन्ही बाजूंकडून दगडफेक आणि घोषणाबाजी करण्यात आल्याने स्थानिकांमध्ये भीतीचे वातावरण पसरले होते. पोलिसांनी घटनास्थळी धाव घेत जमावाला पांगवले आणि परिसरात चोख पोलीस बंदोबस्त तैनात केला. यावेळी मुस्लिम जमावाकडून तलवारी काढून हल्ला करण्यात आला. यात दोन तरुण जखमी झाले होते.
अधिकाऱ्यांच्या म्हणण्यानुसार,भविष्यात असे राडे झाल्यास पोलीस गाड्यांना फिरणे सोपे व्हावे, यासाठी रस्ते मोकळे करण्यात आले.तसेच या हाणामारीत सहभागी असलेल्या समाजकंटकांच्या बेकायदेशीर मालमत्तांचीही पालिका प्रशासनाकडून चौकशी केली जात आहे.