बारामती: राष्ट्रीय अध्यक्षा आणि उपमुख्यमंत्री सुनेत्रावहिनी अजितदादा पवार यांनी आज बारामती विधानसभा पोटनिवडणुकीसाठी उमेदवारी अर्ज दाखल केला आहे. हा फक्त एक उमेदवारी अर्ज नाही, तर अजितदादांनी निवडलेल्या विकासाच्या वाटेवर पुढे जाण्याचा निर्धार आहे अशा शब्दात राष्ट्रवादी काँग्रेसचे प्रदेशाध्यक्ष खासदार सुनिल तटकरे यांनी आज आपले विचार मांडले.
आजही बारामतीकरांच्या मनात दादांबद्दल अपार प्रेम आणि त्यांच्या विचारांवर अपार श्रद्धा आहे. आजवर जशी साथ बारामतीकरांनी दादांना दिली, तशीच साथ आता वहिनींनाही द्यावी, अशी मनापासून विनंती सुनिल तटकरे यांनी बारामतीकरांना केली.
ही निवडणूक बिनविरोध व्हावी अशी आमच्या सर्वांची इच्छा आहे, त्यासाठी शेवटच्या दिवसापर्यंत प्रयत्न करू. परंतु निवडणूक लादली गेलीच, तर भारताच्या विधानसभा निवडणुकांच्या इतिहासातील सर्वाधिक मताधिक्याने वहिनींना बारामतीकर निवडून देतील. बारामतीकरांचं प्रत्येक मत म्हणजे अजितदादांना वाहिलेली खरी श्रद्धांजली ठरेल असेही सुनिल तटकरे म्हणाले.