मुंबई : गुजरात टायटन्सचा कर्णधार शुभमन गिल (Shubman Gill) आयपीएल २०२६ च्या राजस्थान रॉयल्सविरुद्धच्या (Rajsthan Royals) सामन्यात खेळू शकला नाही. त्याच्या अनुपस्थितीमुळे संघाला पराभव स्वीकारावा लागला. जर तो राजस्थान रॉयल्सविरुद्धच्या सामन्यात संघात असता, तर निकाल कदाचित वेगळा लागला असता. सामना संपला आहे आणि संघ पुढील सामन्यावर लक्ष केंद्रित करत आहे. पण चाहत्यांना अजूनही एक प्रश्न पडला आहे की, गिल मैदानावर कधी परतणार? .
रवी बिश्नोईच्या (Ravi Bishnoi) भेदक गोलंदाजीच्या जोरावर राजस्थान रॉयल्सने गुजरात टायटन्सवर विजय मिळवला. राजस्थानने हा रोमांचक सामना ६ धावांनी जिंकला. पंजाब किंग्सविरुद्धचा सलामीचा सामना गमावल्यामुळे गुजरातची आयपीएल २०२६ मध्ये सुरुवात खराब झाली. दुखापतीमुळे शुभमन गिल संघाबाहेर होता आणि त्याच्या जागी राशिद खानने (Rashid Khan) संघाचे नेतृत्व केले.
नाणेफेक जिंकून प्रथम फलंदाजी करण्याचा निर्णय घेतल्यानंतर राजस्थान रॉयल्सने दमदार सुरुवात केली. यशस्वी जयस्वाल आणि वैभव सूर्यवंशी यांनी शानदार फलंदाजी करत ६.२ षटकांत पहिल्या विकेटसाठी ७० धावा जोडल्या. वैभवने १८ चेंडूंमध्ये पाच चौकार आणि एका षटकारासह ३१ धावा केल्या. यशस्वीने ३६ चेंडूंमध्ये ५५ धावांची शानदार खेळी केली.