मुंबई : नाशिकमध्ये उघडकीस आलेल्या भोंदूबाबा अशोक खरात प्रकरणाने आता अधिक गंभीर वळण घेतले आहे, भोंदूबाबा सोबतचे सोशल मीडियावर व्हायरल होणाऱ्या व्हिडिओंमुळे पीडित महिलांवर मानसिकदृष्ट्या मोठा परिणाम झाला आहे. आरोपीकडून झालेल्या शोषणानंतर आता त्याच्याशी संबंधित व्हिडिओ सोशल मीडियावर व्हायरल होत असल्याने पीडिता मानसिक धक्क्यात गेल्या आहेत.
व्हायरल व्हिडिओंमुळे ओळख उघड
गेल्या काही दिवसांत अशोक खरातच्या केबिनमधील काही आक्षेपार्ह व्हिडिओ सोशल मीडियावर मोठ्या प्रमाणात व्हायरल झाले आहेत. या व्हिडिओंमध्ये महिलांचे चेहरे स्पष्ट दिसत असल्याने त्यांच्या ओळखी उघड होण्याची भीती निर्माण झाली आहे. पोलिसांनी वारंवार व्हिडीओ व्हायरल करणाऱ्यांवर गुन्हा नोंदवला जाईल असे इशारे देऊनही हे व्हिडिओ शेअर केले जात असल्याने परिस्थिती अधिकच गंभीर बनली आहे.
पीडित महिलांवर मानसिक परिणाम
पोलिसांची कारवाई आणि आवाहन
या प्रकरणाच्या तपासासाठी स्थापन करण्यात आलेल्या विशेष तपास पथकाकडून पीडित महिलांना पूर्ण सुरक्षा दिली जात आहे. तसेच कोणत्याही प्रकारचा दबाव न घेता पुढे यावे, असे आवाहन करण्यात आले आहे. त्यांच्याकडून माहिती जाणून घेताना चौकशीची जागा ही पूर्णपणे गुप्त ठेवली जात आहे. सायबर पोलिसांकडून व्हिडिओ व्हायरल करणाऱ्यांवर लक्ष ठेवले जात असून, अशा व्यक्तींविरोधात गुन्हे दाखल करण्याची प्रक्रिया सुरू आहे.
कुटुंबीयांवरही संशयाची साखळी
दरम्यान, तपासादरम्यान अशोक खरात याचा मुलगा हर्षवर्धन हा फरार झाल्याची माहिती समोर आली आहे. काही दिवसांपूर्वी त्याची चौकशी करून त्याला सोडण्यात आले होते. मात्र सध्या त्याचा संपर्क होत नसल्याने तो पळून गेल्याची शक्यता वर्तवली जात आहे. यापूर्वीच त्याची पत्नी कल्पना खरातही फरार झाली आहे.
दुहेरी संकटात अडकलेल्या पीडित महिला
या प्रकरणात पीडित महिलांना आधी शारीरिक आणि आर्थिक शोषणाचा सामना करावा लागला, तर आता व्हिडिओ व्हायरलमुळे मानसिक छळ सहन करावा लागत आहे. त्यामुळे या प्रकरणात केवळ आरोपींवर कठोर कारवाईच नव्हे, तर स्त्रियांची आणखी बदनामी होणार नाही याची देखील काळजी घेतली गेली पाहिजे.
