सोशल मीडियावरील दिशाभूल महागात; खोटी माहिती पसरवल्याप्रकरणी गुन्हा दाखल
मुंबई : राज्याचे महसूल मंत्री चंद्रशेखर बावनकुळे आणि त्यांच्या कुटुंबीयांकडे तब्बल १ हजार १४७ एकर जमीन असल्याचा दावा करणारा व्हिडिओ समाजमाध्यमांवर प्रसारित करणे एका व्यक्तीला चांगलेच महागात पडले आहे. बावनकुळे यांच्याबद्दल चुकीची आणि दिशाभूल करणारी माहिती पसरवून त्यांची बदनामी केल्याप्रकरणी नागपूरच्या कोराडी पोलीस ठाण्यात गुन्हा दाखल करण्यात आला असून, प्रशासकीय तपासात हा दावा पूर्णपणे निराधार असल्याचे स्पष्ट झाले आहे.
या तक्रारीनंतर प्रशासकीय पातळीवर खातरजमा करण्यात आली. कामठी तहसीलदारांनी जारी केलेल्या अधिकृत प्रमाणपत्रानुसार मंत्री चंद्रशेखर बावनकुळे आणि त्यांच्या कुटुंबीयांच्या नावावर विविध गावे व सर्वे क्रमांकांमध्ये मिळून एकूण २८.४४ एकर जमीन आहे. समाजमाध्यमांवर केला जाणारा १ हजार १४७ एकर जमिनीचा दावा हा वस्तुस्थितीला धरून नसून पूर्णपणे धादांत खोटा असल्याचे स्पष्ट झाले आहे. याप्रकरणी कोराडी पोलिसांनी ३ एप्रिल रोजी रात्री उशिरा गुन्ह्याची नोंद केली. भारतीय न्याय संहिता (बीएनएस) २०२३ मधील कलम ७८(१)(ii) आणि ३५६(२) अंतर्गत हा गुन्हा दाखल करण्यात आला आहे. पोलीस निरीक्षक गणेश धुमाळ या प्रकरणात अधिक तपास करीत आहेत.